Мелбурн излегува од карантин по 112 дена
Жителите на Мелбурн се соочија со строг крантин: имаа ноќен полициски час, еден час надвор за вежбање, забрана за патување повеќе од 5 км од нивниот дом.
Австралискиот град Мелбурн ќе излезе од карантин во среда откако не е регистриран нов случај со ковид-19 за прв пат од јуни наваму, јави Би-Би-Си.
Државата Викторија беше епицентар на вториот бран во Австралија, со повеќе од 90% од смртните случаи. Главниот град на државата влезе во карантин пред 111 дена што вклучуваше затворање дома, ограничувања во патувањата, затворање на продавници и на ресторани. Денеска властите изјавија дека градот е подготвен повторно да се отвори.
– Со ниеден нов случај и толку многу тестирања викендов, во можност сме да кажеме дека сега е време да се отвориме. Ова се должи на секој еден Викторијанец, кој ги следел правилата, останал на курсот, работел со мене и со мојот тим за да го доведеме до крај овој втор бран – изјави премиерот на Викторија, Даниел Ендрус.
Во јули Викторија имаше повеќе од 700 случаи на ден, но строгите мерки за седење дома и полицискиот час ги намалија бројките.
На 28 октомври во Мелбурн жителите ќе можат да ги напуштат своите домови, ќе се отворат сите продавници, ресторани, кафулиња, барови со групи од 10 луѓе внатре, ќе се дозволат посети по дома, но деталите за тоа ќе се соопштат утре, на свадби ќе биде дозволено до 10 луѓе, на погреби до 20, а групирање надвор ќе биде дозволено до 10 луѓе.
Од 8 ноември граѓаните ќе можат да патуваат низ целата држава Викторија и ќе се отворат фитнес центрите. Сепак, премиерот им порача на граѓаните да останат будни.
Во моменот има 91 активен случај.
Во Австралија со 25 милиони жители имаше 27.500 заразени – многу помалку од други земји. Земјата влезе во карантин во јули кога имаше по 100 заболени дневно. Инфекцијата достигна врв по еден месец и после тоа почна да опаѓа.
Жителите на Мелбурн се соочија со строг крантин: имаа ноќен полициски час, еден час надвор за вежбање, забрана за патување повеќе од 5 км од нивниот дом.
Ова предизвика различни мислења меѓу граѓаните, па дури и мали протести. Бизнисмените и некои други граѓани неколку недели повикуваа државата да се отвори повторно, но имаше и граѓани кои го поддржуваа внимателниот пристап на премиерот.