Матичните лекари се жалат од пациентите: Имаме огромен притисок, исплашени се!

Лекарите од примарното здравство имаат преголем притисок од исплашени пациенти. Како лекарска фела бараме од пациентите да ја смират целата ситуација и да се направи добра тријажа-распоредување и групирање на болните во групи според природата на болеста, вели Лилија Чолакова Дервишова, претседател на Здружението на приватни лекари.

Таа порачува пациентите кои имаат сезонски настинки да седат дома и да добијат информации по телефон, а рецептите да ги земе некој член од семејството.

– Оние кои се потешки случаи мора да бидат прегледани. Сите болести не можат да се лекуваат преку телефон, туку мора да има лекарски прегледи бидејќи имаме пациенти и со мозочни удари и инфаркт –  вели Чолакова Дервишова во изјава за МИА.

Апелира граѓаните кои немаат симптоми на ковид-19, да не се тестираат.

Претставници на здружението на приватни лекари деновиве оствариле средба со министерот за здравство Венко Филипче, на која барале да се реши нивните проблеми.