📽 МАРКОВА РЕКА ПОПЛАВИ МАГАЦИНИ ВО ПИНТИЈA Интервенираат службите од Студеничани, Кисела Вода и Град Скопје
Во текот на ноќта, на Единствениот број за итни повици 112 добиени се и пријави за поплавени куќи во Горно Лисиче (општина Аеродром), каде што интервенира ЕЛС Аеродром.
Водостојот на Маркова Река која вчера се излеа е двојно зголемен. Реката поплави неколку куќи магацини и индустриски објекти во селата Студеничани и Батинци, но и дел од булеварот Борис Трајковски кај Пинтија каде исто така имало пријави за поплавени магацини, известува Центарот за управување со кризи.
Маркова Река се излеа преку мостот кај Љубош и надојде низводно.
Според информациите од лицето за контакт од ЕЛС Студеничани, интервенираат службите на ЕЛС Студеничани со локалните фирми, а исто така на терен има и претставници од ЕЛС Кисела Вода.
Во текот на ноќта, на Единствениот број за итни повици 112 добиени се и пријави за поплавени куќи во Горно Лисиче (општина Аеродром), каде што интервенира ЕЛС Аеродром.
ТВ21 објави снимки од излевањето.
Исто така, на поплавените места интервенираат и БППЗ на Град Скопје и Јавните претпријатија на Град Скопје и ЕЛС.
АМСМ известува дека непроодни се локалниот пат с.Горно Лисиче кон с.Долно Лисиче (општина Аеродром) и првиот мост во с.Батинци (опш.Студеничани).
ЈСП Скопје, известува дека поради поплавите од Маркова Река, автобусот со број 70 сообраќа до почетна/крајна станица Дризла и автобусот со број 33 преку населба Драчево во двете насоки.
Македонски железници известуваат дека железничкиот патнички и товарен сообраќај, од 22:50 часот е во прекин во правец на Лисиче и Драчево и обратно, додека патничкиот сообраќај се одвива преку станицата Трубарево.
Според утринските податоци од хидролошките станици низ земјава, водостоите на сите реки низ земјава се доста високи и таа тенденција се очекува да продолжи во текот на денешниот ден.