МАРИН ЛЕ ПЕН ЌЕ ЛЕЖИ ЗАТВОР? Лидерката на француската крајна десница доби 5-годишна забрана за вршење јавна функција

Лидерката на француската крајна десница, Марин Ле Пен, е осудена на четиригодишна затворска казна, од кои 2 години условно, и доби 5 забрана за вршење јавна функција, поради злоупотреба на европски средства, објави Ен-Би-Си њуз.

При изрекувањето на пресудата, судот наведе дека делата што ги сторила 56-годишната Ле Пен заслужуваат итна забрана за вршење јавна функција.

Ле Пен може успешно да ја обжали пресудата и таа нема да се примени додека не бидат исцрпени сите жалбени постапки. Иако 2 од четирите години затворска казна се условни, забраната ги урива нејзините надежи да се кандидира на претседателските избори во 2027 година, а тоа претставува голем удар за француската крајна десница и може да значи крај на нејзината политичка кариера.

Париското обвинителство претходно побара, доколку биде прогласена за виновна, Ле Пен да биде исклучена од изборната трка и да добие петгодишна затворска казна, заедно со парична казна од 300.000 евра (316.860 долари). Во конечната пресуда, судот ѝ изрече парична казна од 100.000 евра.

Десничарската лидерка и 24 други функционери од нејзината партија Национален собир се обвинети дека пренасочиле повеќе од 3 милиони евра од средствата на Европскиот парламент за плаќање на персоналот со седиште во Франција помеѓу 2004 и 2016 година. Седејќи во првиот ред од судницата во Париз, Ле Пен не покажа никаква реакција додека судијата ја читаше пресудата.

– Утврдено е дека сите овие лица всушност работеле за партијата, без да им бидат доделени никакви задачи од европратеникот. Истрагата утврди и дека ова не е административна грешка, туку повеќе е проневера како дел од системот, дизајниран да ги намали трошоците на партијата – рече судијата Бенедикт де Пертуис

Ле Пен ги отфрли обвинувањата дека била на чело на „системот“ чија цел е да ги исфрли средствата од ЕУ во корист на нејзината партија. Обвинетите негираа дека сториле нешто лошо и тврдеа дека средствата биле користени легитимно.

Ле Пен трипати се кандидираше за претседател, а претходно изјави дека изборите во 2027 година ќе бидат нејзиниот последен обид да ја освои највисоката функција.