МАРЈАН ШОКАРОВСКИ НА МЕСТОТО НА САШКО ЈОВЕВ Нов директор на Клиниката за кардиохирургија
Тој е дел од тимот на досега извршените трансплантации на срце во нашата држава, вклучен и во иновативните хируршки интервенции на срце со минимален инвазивен пристап – нагласува Министерството за здравство.
За нов директор на Универзитетската клиника за државна кардиохирургија е назначен д-р Марјан Шокаровски, кој е дел од тимот на клиниката уште од нејзиното основање – информира Министерството за здравство.
„Д-р Шокаровски е супспецијалист по кардиохирургија, специјализирал на Универзитетски клинички и болнички центар – Загреб, Хрватска, со повеќегодишно хируршко и академско искуство во оваа област, раководител е на оперативниот блок, ангажиран е и како асистент на Медицински факултет-Скопје.
Тој е дел од тимот на досега извршените трансплантации на срце во нашата држава, вклучен и во иновативните хируршки интервенции на срце со минимален инвазивен пристап. Исто така се едуцирал во повеќе земји, како Германија, Австрија, Англија, Франција, Бугарија, Србија и присустувал на голем број меѓународни конгреси.
За нов организациски директор на Клиниката за државна кардиохирургија е назначен Исак Јакупи“ – се вели во соопштението
Пред повеќе од две недели министерот за здравство Фатмир Меџити го разреши кардиохирургот Сашко Јовев од директоркото место на Клиниката за кардиохирургија, и притоа рече дека во неговото работење биле утврдени нерегуларности. Подоцна му понуди да биде негов советник, што тој го одби, и на крајот остана на Клиниката за кардиохирургија.