МАМДАНИ МУ ПОДГОТВУВА АПСЕЊЕ НА НЕТАНЈАХУ ВО СЕПТЕМВРИ Њујоршкиот градоначалник се повикува на налогот за апсење на Судот во Хаг

Градоначалникот на Њујорк, Зохран Мамдани, изјави дека неговата администрација разгледува дали има законско овластување да го уапси израелскиот премиер Бенјамин Нетанјаху доколку  тој да го посети градот во септември за Генералното собрание на Обединетите нации.

– Верувам дека местото на премиерот Нетанјаху е во Хаг.Тој е воен злосторник кој е обвинет од Меѓународниот кривичен суд. Тоа не е само мое мислење, туку став на многу луѓе, имајќи ги предвид последиците од неговите постапки во изминатите години – рече Мамдани во интервју за поткастот „Интервју“, објавено од „Њујорк тајмс“, осврнувајќи на налогот за апсење на Нетанјаху на Меѓународниот кривичен суд (МКС) од ноември 2024 година.

Мамдани призна дека не е сигурен дали како градоначалник има овластување да ѝ наложи на њујоршката полиција да уапси странски државјанин, но рече дека е во „активни разговори“ со правниот оддел на градот.

– Што и да дозволува законот во Њујорк, тоа ќе го направиме. Но, ние нема сами да ги пишуваме законите за да го овозможиме тоа – рече тој.

Налогот за апсење на МКС за Нетанјаху и други израелски функционери содржи обвиненија за воени злосторства и злосторства против човештвото, вклучително и употреба на глад како метод на војување, убиства, прогон и други нехумани дела за време на војната во Газа.

Правните експерти претходно цитирани од „Њујорк тајмс“ оценија дека на градоначалникот би му било многу тешко да изврши такво апсење во практика и дека би можел да влезе во директен конфликт со американските федерални власти.

Соединетите Американски Држави не се членка на Меѓународниот кривичен суд и не ја признаваат неговата надлежност.

Американскиот претседател Доналд Трамп на почетокот на 2025 година воведе економски санкции против МКС, тврдејќи дека судот нема надлежност над САД или Израел. Државниот секретар Марко Рубио потоа изјави дека Вашингтон ќе работи на „распуштање“ на судот, обвинувајќи го дека води „војна под маската на меѓународното право“ против САД.

Нетанјаху, кој се соочува со парламентарни избори во Израел оваа есен, ги отфрли заканите на Мамдани за апсење, велејќи дека не е загрижен од нив. Во исто време, го обвини градоначалникот на Њујорк дека го поддржува Хамас.

-Тој е на страната на терористите. Не разбира или не му е грижа што оние што ги мразат Евреите и Израел на крајот ја мразат Америка – рече Нетанјаху во интервју за радио WABC.

Амбасадорот на Израел во ОН, Дени Данон, го обвини Мамдани, првиот муслимански градоначалник на Њујорк, дека не прави доволно за борба против антисемитизмот. Мамдани одговори со зголемување на финансирањето за градската канцеларија за злосторства од омраза.

Светските лидери треба да се соберат во Њујорк во септември на редовната годишна сесија на Генералното собрание на ОН, на која традиционално учествува и Нетанјаху.