МАКСТИЛ ДОБИ 2 НАГРАДИ ОД МАКЕДОНСКА БЕРЗА Економската и енергетската криза не беа пречка за постигнување на целта

Макстил е добитник на две награди од Македонска берза за хартии од вредност, награда за „Акција со најголем пораст на цената во 2022 година“ и награда за „Акција со најголем пораст на прометот во 2022 година“. Изборот на наградените друштва кои котираат на македонската берза и компании во различни категории се прави врз основа на квантитативни статистички показатели и дефинирани квалитативни критериуми согласно утврдени процедури за статистичка анализа на остварениот берзански промет во тековната година.

– Добивањето на овие награди втора година по ред зборува најмногу за вредноста на Макстил како компанија и работата дури и во година на најголема економска и енергетска криза без никаква помош или субвенции од државата. И покрај сите неизвесности и сериозни предизвици, Макстил успеа да ги постигне зацртаните цели, да го одбележи својот јубилеј и да ја исполни својата општествена одговорност кон граѓаните и заедницата од широк опсег со повеќекратни вредни донации. Оваа година не изостанаа ни инвестициите во развојните програми и во безбедноста на нашите вработени. Од сите овие аспекти на работата на Макстил, произлегоа позитивните резултати што сега ги гледаме и преку овие две награди од Македонска берза со што дополнително се вреднува компанијата – истакна Марија Дуковска Павловска, Извршен член на Одборот на директори и Генерална директорка, при доделувањето на наградите.

Наградите се доделуваат веќе втора година на годишното наградување на членките и котираните друштва а со цел да им се даде признание на најпрепознатливите и најактивни учесници и субјекти на македонскиот пазар на хартии од вредност.

Во доделувањето на годишните награди учествуваат сите компаниите кои котираат на берза и се дел од македонскиот пазар на хартии од вредност. Наградите се доделуваат во 7 различни категории дефинирани според разни показатели и берзански индикатори.