МАКСИМ И КУМАНОВО СПРЕМНО ЌЕ СЕ СООЧАТ СО ПАНТЕРОТ Животното се движи на југ, дали ќе стаса во Македонија?

Откако вчера во Србија се објавија нови снимки од пантерот кој за кратко време пристигнал од Апатин, на унгарско-српската граница, до Фекетиќ оддалечен осумдесетина километри, загрижени граѓани на страниците на српските портали прашуваат која ќе биде неговата следна дестинација. Многумина се уверени дека животното ги следи своите инстинкти и самото ќе си го најде патот до потоплите краишта.

– Србија, Македонија, па Грција? Во природата му е да се движи кон југ – коментираат граѓани на социјалните мрежи.

Ненад Тешиќ од еколошкото здружение „Движење за сите нас“ за српските медиуми изјави дека е очигледно како животното се движи на југ, односно од Војводина кон Централна Србија и апелираше луѓето да ја сфатат сериозноста на ситуацијата.

Ситуацијата сериозно е сфатена во општината Врбас. Откако опасниот црн пантер, по кого во Србија се трага веќе 17 дена, повторно е забележан во Срборбан кај Врбас, Општинскиот штаб на Врбас за вонредни ситуации одржа специјална седница.

По вестите дека пантерот за само неколку дена поминал 80 километри и се движи кон потоплите краишта, при што следната дестинација можеби е Македонија, вечерва седница одржа и Кризниот штаб на општина Куманово. На седницата присуствуваа сите надлежни служби, вклучувајќи и претставници на Здружението на ловџиите.

По седницата, градоначалникот Максим Димитриевски даде куса изјава за медиумите:

– Во рамките на проектот „Отворен Балкан“, ние сме постојаната комуникација со нашите колеги од Врбас. Од Ветеринарниот факултет во Скопје добивме известување дека црниот пантер навистина во принцип се движи кон потоплите краишта. Очекуваме Србија, како и за време на пандемијата и во енергетската криза, да ни пружи помош, на тој начин што братските српски општини ќе се фатат во костец со опасниот пантер пред тој да стаса на нашата северна граница. Но, дури и да стаса, нема простор за паника. Иако централната власт на чело со СДСМ веќе подолго време покажува неспособност да се справи со вакви кризни ситуации, ве уверувам дека Куманово и јас сме спремни да се соочиме со големиот предизвик – рече тој.

Експерти кои ги проучуваaт дивите мачки велат дека пантерот има инстинкт да се движи кон потоплите краеви. Го има во Африка, но и во Азија, Аргентина, Бразил, Панама, Венецуела, Перу. Живее во шуми, савани, но и во планини и пустини и е многу прилагодлив на околностите.  Тоа е уште една од предностите на Северна Македонија, објаснуваат експертите – во околности во какви што сега живеат луѓето во нашата земја, тешко е било кој да се снајде, па макар бил и опасен црн пантер. Добри се шансите тој да ја заобиколи Македонија која допрво треба да почне да преговара со ЕУ, па преку Бугарија да стаса во Грција, најдоцна пред почетокот на летната сезона.

Предаторот кој изминативе неколку недели го вознемири населението во Србија, најверојатно во земјата дошол од Унгарија. Откако животното прв пат е забележано во оваа земја, биле извршени проверки во сите зоолошки градини во Унгарија и не било регистрирано исчезнување на ниту еден црн пантер. Поради тоа, официјалниот заклучок од надлежните власти беше дека станува збор за животно кое најверојатно било илегално донесено и чувано во Унгарија. Експертите велат дека тоа во оваа земја и не е така ретка појава, бидејќи често се случува големи ѕверки од различна провиненција да залутаат во Унгарија, но само мал дел од нив добиваат азил и луксузен престој во Будимпешта.

(Сатирична вест)