МАКЕДОНСКИОТ ТЕКСТИЛ НАЈМНОГУ ЌЕ НАСТРАДА ОД ТРГОВСКАТА ВОЈНА НА ТРАМП СО ЕВРОПА Ние на Американците царини до 65%, тие нам – 33%!

Македонија ќе биде индиректно погодена од царините на американската администрација воведени од денеска, велат експерти и бизнисмени.

Претседателот на САД, Доналд Трамп, соопшти дека од денеска се воведуваат нови царини кон 60 земји во светот кои имале високи царини на американските стоки.

Меѓу земјите се најде и Македонија, која според она што е објавено на американската царинска листа имала царини за американските стоки од 66%, па затоа им одреди царина од 33% на производите увезени од земјава.

Според извори на Плусинфо, македонските царини за американски стоки се од 0% до 65%.

Очекувањата се дека најголем удар ќе се почувствува кај извозните компании, посебно авто-индстријата и текстилот кои ќе се соочат со намалена побарувачка, но ќе има последици и врз инвестициите, инфлацијата, платите, работните места и економскиот раст.

– Царината од 33% која ја воведе Трамп не е проблем за земјава, но многу голем проблем е тоа што со американските царини е погодена Европската Унија, која е најголем партнер на македонската економија и посебно Германија со која се реализира половина од извозот на земјава. Намалувањето на побарувачката за нашите извозни компании ќе ги натера да се обидат да останат конкурентни на пазарот со намалување на цените на производот, а тоа ќе значи работење на работ на рентабилност или во загуба, што ќе придонесе компаниите да размислуваат за намалување на трошоците. Тука ќе настрадаат прво инвестициите, потоа платите, а потоа и ќе се отпушта работници – вели професорот Ванчо Узунов.

Тој смета дека сето тоа ќе се одрази и на инфлацијата, странските директни инвестиции и на растот на економијата.

Бизнисменот Ангел Димитров вели дека текстилната индустрија во земјава ќе биде уништена како последица на царините на САД кон ЕУ.

– Текстилот веќе е уништен поради намалената побарувачка на партнерите во Германија, кои бараат поевтин производ. Ние се ценкаме и за 10 и 15 центи со нашите партнери и не успеваме да издејствуваме цена која ќе ни овозможи натамошно работење. Германците веќе бараат поевтин производ надвор од земјава. Кој  може да размислува за инвестиции, да размислува за повисоки плати или профит во услови кога партнерите секој месец ја намалуваат побарувачката на нашиот производ – вели тој.

Димитров смета дека и автомобилската индустрија ќе ја доживее судбината на текстилот.

– Ако се намали извозот на БМВ, Мерцедес, Рено, ќе се намали и потребата за кабли, седишта и друга галантрија која се произведува кај нас. Тоа ќе значи проблем за нашата автомобилска индустрија, за извозот, инвестициите и растот на БДП – вели тој.

Професорот Узунов сметаа дека земјава не може ништо да направи во целата ситуација, бидејќи ова е војна на Трамп со неговите големи економски партнери, а малите неразвиени економии ќе ги трпат последиците.

– Излегувањето од кризата која ја започна Трамп со светот ќе значи и излегување од ова криза и на земјава. До тогаш ќе мора да ги трпиме последиците од тоа и да се обидеме да преживееме – вели Узунов.

Тој не очекува Европската Унија да ја вклучи земјава во царинската војна со САД и да ѝ воведе повисоки царини.

– Напротив и оние царини кои сега ги има за нашите производи ќе ги намали, ако веќе и не ги намалила – вели тој.

И поранешниот министер за финансии Џевдет Хајредини смета дека земјава нема директно да биде погодена од царината која ја воведе американската администрација на земјава.

– Тоа е начелна економска политика на Трамп во која тој не ги гледа малите земји како нашата, туку само големите партнери. Земјава има мала трговска размена со САД и нема да има директни значајни последици од овие царини, но ќе треба да се усогласиме со потезите што ќе ги презема Европската Унија, бидејќи 60% од нашиот извоз оди таму – вели Хајредини.

Според податоците на Државниот завод за статистика, вкупната размена на Македонија со САД во 2024 година изнесувала нешто над 314 милиони долари, наспроти 320,7 милиони долари во 2023 година, што значи дека била помала за 2,1 %

Извозот од Македонија во САД лани достигнал 118,2 милиони долари, што е за 2,2 пати повеќе од претходната 2023 година, кога бил 53,6 милиони долари. Истовремено, лани од САД биле увезени производи за 195,9 милиони долари, за 26,6% помалку од 2023 година кога увозот во Македонија од САД бил 267 милиони долари.

Oд Македонија во САД најмногу се извезувале машини и транспортни уреди, храна, пијалаци и тутун.