МАКЕДОНСКИ И БУГАРСКИ ЕКСПЕРТИ ВО БРИСЕЛ ЌЕ РАСПРАВААТ ЗА ЖЕЛЕЗНИЦАТА КОН БУГАРИЈА Изградбата на тунелот ќе ја договараат Николоски и Караџов на посебна средба
Потенцирајќи го прашањето за железничкото поврзување меѓу двете земји, двајцата соговорници нагласија дека овој проект има регионална димензија, каде покрај економското значење, се наметнува и прашањето за стратешкото позиционирање на НАТО Алијансата преку поврзување на Јадранското и Црното Море.
Вицепремиерот и министер за транспорт Александар Николоски денеска оствари средба со вицепремиерот и министер за транспорт и врски на Бугарија, Гроздан Караџов. Средбата се одржа во рамки на форумот „Глобална Транспортна Поврзаност” што се одржува во Истанбул.
На средбата, како што соопшти Министерството за транспорт, била истакната неопходноста за изградба и модернизација на европските транспортни коридори, со посебен акцент на железничкиот и патниот Коридор 8, како предуслов до регионален економски развој и олеснување на транспортот и трговијата.
„Потенцирајќи го прашањето за железничкото поврзување меѓу двете земји, двајцата соговорници нагласија дека овој проект има регионална димензија, каде покрај економското значење, се наметнува и прашањето за стратешкото позиционирање на НАТО Алијансата преку поврзување на Јадранското и Црното Море. Двајцата соговорници се согласија за нова средба во периодот кој следи со цел заеднички да се усогласи текстот на Договорот со кој ќе се постигне согласност за изградба на заедничкиот тунел којшто треба да ги поврзе Македонија и Бугарија со што ќе се придвижат работите за реализација на железничкиот Коридор 8“, се наведува во соопштението.
Двајцата соговорници се согласиле да испратат експерти да учествуваат на состанокот за Коридор 8 што го организира Европската Комисија во јули.