МАКЕДОНИЈА САКА БЛИСКИ ОДНОСИ СО ПАРТНЕРИТЕ Заедно со Катар имаме огромен потенцијал за развој на одбранбената соработка

Северна Македонија како земја – членка на НАТО сака да развива блиски одбранбени односи со важните партнери на Алијансата, како што е Катар.

Оваа прва средба е само почеток на една плодна соработка на која сме исклучително посветени и убедени дека има огромен потенцијал, истакнала министерката за одбрана Славјанка Петровска на денешната средба со вицепремиерот и државен министер за одбрана на Катар, Халид Бин Мохамед Ал-Атија, кој престојува во прва официјална посета на Северна Македонија.

Од Министерството за одбрана информираат дека двајцата соговорници, зборувајќи за безбедносната состојба во светот, се согласиле дека дијалогот е најкусиот пат кон мирот и стабилноста.

– Ја цениме улогата на Катар во унапредувањето на глобалната безбедност. Би сакала да изразам најдлабока благодарност за помошта и поддршката од Катар минатиот септември, при евакуацијата на македонските граѓани од Авганистан – нагласила министерката Петровска.

Потенцирала дека Северна Македонија е подготвена да продолжи со интензивните контакти за усогласување и потпишување на меморандум за соработка во областа на одбраната со Катар, не само како правен документ, туку како конкретен план на активности за соработка.

– Потенцијалот за блиска одбранбена соработка е навистина голем. Армискиот полигон „Криволак“ нуди одлични можности за вежби и обуки кои ќе бидат од корист и за двете вооружени сили. Имајќи го предвид негативното влијание на дезинформациите и лажните вести, во Министерството развиваме Центар за справување со овие закани и тоа може да биде уште една одлична можност за билатерална соработка – посочила министерката.

Петровска истакнала дека Северна Македонија и Армијата се отворени за соработка во доменот на Центарот за обука на пилоти и заедничките инвестиции во инфраструктурата.

Катарскиот вицепримиер и државен министер за одбрана Ал-Атија порачал дека Северна Македонија е важен пријател и партнер на Катар и изразил подготвеност за продлабочување на одбранбената соработка.

Тој го честитал членството на Северна Македонија во Алијансата и се согласил дека можностите за развивање на соработката во одбраната се извонредни, а неговата неколкудневна посета на Северна Македонија ќе придонесе кон конкретизирање на областите на соработка.

Во рамки на посетата, делегацијата од Катар ќе го посети и армискиот полигон „Криволак“, а ќе има средби и со највисокиот државен врв на Северна Македонија.

Катар е дел од Истанбулската иницијатива за соработка на НАТО, а практичната соработка на Алијансата со оваа држава се остварува преку Индивидуална програма за партнерство и соработка и преку програмата „Наука за мир и безбедност“ фокусирана на напредната технологија поврзана со сајбер безбедноста. Истанбулската иницијатива за соработка е креирана на Самитот на НАТО во 2004 година и освен Катар, во оваа иницијатива членуваат и Бахреин, Кувајт и Обединетите Арапски Емирати.