Македонија сѐ уште не знае кому ќе ја дава вакцината од „АстраЗенека“
Министерството за здравство при употреба на овие вакцини ќе се води според препораките на официјалните европски агенции. Сите вакцини се безбедни и се развиени на безбедни платформи, одговорија од Министерството на прашањето од Плусинфо каков е нивниот став во врска со аплицирањето на оваа вакцина кај лицата постари од 65 години.
Македонија сѐ уште не знае кому ќе ја дава вакцината од „АстраЗенека“, а како што велат од Министерството за здравство – ќе ги следат препораките на официјалните европски агенции.
Деновиве неколку земји соопштија дека прекинале да ја даваат оваа вакцина на лица постари од 65 години поради недоволна испитаност на ефектот кај таа возрасна категорија.
„Вакцината на АстраЗенека нешто подолго од еден месец се аплицира во Велика Британија и истата е одобрена од регулаторните тела. Препораките се оваа вакцина да не се употребува за пациенти повозрасни од 65 години, но истите сѐ уште не се внесени во официјалното упатство. Министерството за здравство при употреба на овие вакцини ќе се води според препораките на официјалните европски агенции. Сите вакцини се безбедни и се развиени на безбедни платформи“, одговорија од Министерството на прашањето од Плусинфо каков е нивниот став во врска со аплицирањето на оваа вакцина кај лицата постари од 65 години.
Оттаму не одговорија на кои лица ќе им се дава оваа вакцина кога ќе пристигне во Македонија.
Министерството за здравство пред два дена информира дека Ковакс системот им соопштил дека првата вакцина која ќе пристигне во март во нашата земја е таа на „АстраЗенека“. Од Ковакс информирале дека за Северна Македонија се предвидени помеѓу 103.200 и 175.200 дози од оваа вакцина, од кои околу 35 отсто треба да пристигнат во првиот, а останатите во вториот квартал од годинава.
Норвешка, Белгија, Швајцарија се дел од земјите кои не одобрија примена на оваа вакцина за лица постари од 65 години со образоложение дека во испитувањата спроведени од „АстраЗенека“ учествувале мал број луѓе постари од 65 години, што значи дека нема документација за влијанието на вакцината врз постарите групи на население.
Фамата прв ја крена францускиот претседател Емануел Макрон кој рече дека вакцината е „квази-ефикасна“ за луѓе над 65 години.
На тоа остро реагираше еден од креаторите на вакцината во Оксфорд, Ендру Полард, додавајќи дека тој „не знае за што зборува Емануел Макрон“.
– Вакцината „Ковидшилд“ развиена од „АстраЗенека“ и Универзитетот во Оксфорд, обезбедува добар имунолошки одговор кај постарите лица, иако нема доволно податоци за да се утврди точната ефикасност. Поентата е дека имаме помалку податоци за постарите луѓе, поради што луѓето имаат помала доверба во нивото на заштита – рече Полард.