МАКЕДОНИЈА И СРБИЈА СОРАБОТУВААТ НА ПОЛЕТО НА НУКЛЕАРНАТА И РАДИЈАЦИОНАТА БЕЗБЕДНОСТ Експерти разменуваат искуства и знаења

Делегација од Дирекцијата за радијациона сигурност, предводена од директорот на дирекцијата, Зоран Бајовски, оствари посета на регулаторното тело на Република Србија.

Целта на посетата беше зајакнување на соработката помеѓу двете регулаторни тела, преку потпишување на договор за соработка, кој ќе биде основа за размена на искуства и знаења помеѓу експертите од двете регулаторни тела во повеќе области како: искуства во подготовка и усогласување на националното законодавство со меѓународните стандарди, постапка на издавање дозволи за дејност со извори на јонизирачко зрачење, инспекциски надзор, подготвеност и одговор во случај на радијационен вонреден настан и нелегална трговија со радиоактивни материјали.

Притоа беа разменети мислења и предлози во насока на подобрување на нацрт текстот на договорот за соработка.

Посетата беше оценета како исклучително значајна од двете страни во насока на продлабочување на идната соработка во областа на радијациона и нуклеарна сигурност и безбедност.