МАКЕДОНИЈА И ЧЕТИРИ ЗЕМЈИ ОД БАЛКАНОТ ЌЕ ЛАНСИРААТ САТЕЛИТ?! На проектот работат невладини организации, наводно сателитот ќе ни го подари Индија

Пет невладини организации од Македонија, БиХ, Црна Гора, Србија и Хрватска работат на лансирање сателит во земјината орбита, а сателитот ќе го донира Индија во чест на 75-годишнината од својата независност, објави БХРТ, а веста ја пренесоа повеќе балкански медиуми меѓу кои хрватски 24сата, црногорско Ослободување, српски Данас и Слободен Печат. Веста не е уште потврдена, иако видео-прилогот на БХРТ е уверлив.

– Значи, сите сме многу горди што го распределуваме нашето време и што сите имаме иста цел да ја унапредиме и прошириме таа вселенска програма во сите земји од регионот – вели во видеото на БХРТ, Анес Хаџиомеровиќ од Центарот за образование и роботика, иновации и Технологија (CERIT).

Според БХРТ, проектот го води Босна и Херцеговина со партнерите од регионот. Се вели дека БиХ неодамна станала дел од Вселенската асоцијација на Југоисточна Европа во која влегуваат и Комитетот за развој на вселенската програма од Нови Сад, црногорското вселенско истражување од Подгорица, Јадранската асоцијација за авијација од Загреб и Центарот за иновации и технолошки развој НАВИА од Скопје.

– Ако трошоците се поделат на петмина, да речеме Црна Гора се занимава со развојот на ракетите, Хрватска со комуникацијата, Србија со горивото, мислам дека ова е идеална шанса и многу ми е драго што се обединивме и може да биде сериозна приказна од сето ова – вели Никола Перковиќ од Црна Гора.

Основна цел на сите пет невладини организации, посочуваат соговорниците, е едукација на младите.

Веста предизвика лавина реакции во јавноста, а многу од луѓето се потсмеваат со евентуалната вселенска програма на екс-Југославија.