Лозарите ги закроија лозјата, се очекува бериќетна година

Министерот за земјоделство Арјанит Хоџа денеска учествуваше во закројување на лозје во неготинско, во чест на денешниот празник ,,Свети Трифун”, кој се смета за заштитник на лозарите и винарите.

– Очекуваме оваа година да биде добра, бериќетна, исто така да може самите лозари да бидат претпазливи во делот на квалитетот што треба за производство на грозјето, а од друга страна, како министер и како одговорен за ресорот за субвенциите, гарантирам дека ќе ја имаат истата помош, истата поддршка од наша страна – изјави Хоџа.

Лозарството, нагласи тој, е навистина стратешка гранка за нашата држава.

– Мора заеднички со дијалог и со лозарите и со откупувачите, односно со винарските визби, да придонесеме за да биде лозарството одржливо, развојно и приоритетно за нашата држава – посочи Хоџа.

Неготинскиот градоначалник, Тони Делков потсети дека во неготинскиот крај нема семејство коешто не се занимава со лозаропроизводителство, дали професионално или како дополнителна дејност.

– Неготино и секој еден наш граѓанин се гордее на виновата лоза, на производството на вино и ракија – додаде Делков, осврнувајќи се на настаните организирани по повод празникот, посакувајќи плодна и успешна година.