ЛОВЕЈЌИ СЕ ЛИЗНАЛ ОД КАРПА И ПАДНАЛ ВО БЕЗДНА Пожарникарите цел ден го извлекувале неговото мртво тело
Карпата од која паднал жителот на Кавадарци била висока 150 метри.
Кавадарчанец загинал по пад од карпа при лов, a пожарникари вчера го извлекле телото. Пожарникарите за да го извлечат телото се движеле по тесни и лизгави карпи.
– До нас беше пристигнато барање за извлекување на безживотно тело на наш сограѓанин кој доживеал несреќа при лов, паднал од карпа висока 150 метри. Веднаш одговоривме на барањето и интервениравме со петмина пожарникари и опрема за работа на височина (алпинистичка опрема). Со придружба од четворица припадници на МВР Кавадарци и двајца членови на фамилијата се упативме кон длабокиот и непристапен стрмен терен. Поради тоа што телото на нашиот сограѓанин се наоѓаше на непристапен и непрооден терен, моравме да користиме опрема за алпинизам, да се врзуваме и обезбедиме меѓу себе, да не дојде до дополнителни незгоди – информираат од ТППЕ Кавадарци.
Извлекувањето траело речиси цел ден по екстремно тешкиот терен. Телото на загинатиот е предадено на полицијaта.