Лидерската средба закажана за утре напладне кај претседателот Пендаровски
На средбата ќе присуствуваат и претседателот на Собранието, Талат Џафери, како и претседателот на Владата, Оливер Спасовски.
Лидерската средба во Кабинетот на претседателот ќе се одржи утре точно напладне, а на состанокот ќе присуствуваат претседателоте на парламентарните политички партии од власта и од опозицијата, кои на последните парламентарни избори освоија пратенички мандати со самостојни листи, наведено е во соопштението од претседателскиот Кабинет.
Како што е посочено, на лидерската средба е најавено присуството на претседателот на СДСМ, Зоран Заев, на претседателот на ВМРО-ДПМНЕ, Христијан Мицкоски, на претседателот на ДУИ, Али Ахмети, на претседателот на Алијансата за Албанците, Зијадин Села, на претседателот на Алтернатива, Африм Гаши, на претседателот на Беса, Билал Касами, како и на претседателот на ДПА, Мендух Тачи.
На средбата ќе присуствуваат и претседателот на Собранието, Талат Џафери, како и претседателот на Владата, Оливер Спасовски.
„Изјавите за медиумите по завршување на лидерската средба, ќе бидат пренесувани на Јавниот сервис МРТ, на Фејсбук страницата на Претседателот и на „ЈуТјуб“ каналот. Поради мерките и препораките на Владата за заштита од коронавирусот, ги охрабруваме медиумите да го преземат видео материјалот и фотографиите кои ќе бидат веднаш дистрибуирани“, наведено е во соопштението.