Левица бара итна седница за пратенички прашања
Партијата упатила писмено барање до претседателот на Собранието Талат Џафери.
Партијата Левица соопшти дека денеска до претседателот на собранието Талат Џафери упатила писмено барање за одржување седница на Собранието за пратенички прашања.
„Ваквата специјална седница, според Деловникот, е предвидено да се одржува секој последен четврток во месецот. Бидејќи утре е последниот четврток во тековниот месец август, а воедно е и последна шанса за поставување пратенички прашања на министрите од техничката преодна Влада на РМ во заминување – нашите пратеници побараа итно свикување пленарна собраниска седница, како би се овозможил уставниот принцип на парламентарна контрола на законодавната врз извршната власт“, се наведува во соопштението.
Од партијата додаваат дека планираат да го отворат контроверзното прашање за пропаста на „Еуростандард банка“ АД Скопје во стечај и на тргувањето со инсајдерски информации од страна на актуелни функционери на штета на граѓаните и јавниот интересќ
Побарано е и задолжително присуство на министерката за финансии Нина Ангеловска и на гувернерката на Народната банка Анита Ангеловска-Бежовска што е во согласност со членот 38 од Деловникот за работа на Собранието..