ЛЕКАРИТЕ СЕКОЈДНЕВНО СЕ СООЧУВААТ СО ПОСЛЕДИЦИТЕ ОД ПУШЕЊЕТО Лекарската комора потсетува дека здравјето е над сите други интереси

Лекарска комора на Република Северна Македонија, како професионална организација која ги обединува лекарите од сите нивоа на здравствената заштита, дава поддршка за новиот Предлог-закон за заштита од пушење и за мерките што со него се воведуваат, а со цел унапредување на јавното здравје и заштита на населението, особено на децата, младите и ранливите групи.

„Докторите секојдневно се соочуваат со последиците по здравјето од употребата на тутунски и никотински производи и изложеноста на чад. Кардиоваскуларните заболувања, малигните болести, хроничните белодробни состојби и бројни други здравствени проблеми директно или индиректно се поврзани со пушењето и претставуваат сериозен товар и за поединецот и за здравствениот систем“, се наведува во соопштението од Комората.

Следејќи ги добрите европски практики, Лекарската комора смета дека новите мерки за контрола на тутунските и никотинските производи, како и заштитата од пасивно пушење, значително ќе придонесат за намалување на бројот на нови корисници на овие производи (особено кај младите), ефикасна заштита на непушачите во затворени простории и создавање здрава животна и работна средина.

„Здравјето на граѓаните мора да биде над сите други интереси. Веруваме дека доследното почитување на законските ограничувања ќе резултира со помал број хоспитализации и долгорочни придобивки за целото општество“, се нагласува во соопштението од Комората.

Лекарската комора останува подготвена активно да учествува во креирање на јавна свест за опасностите од употребата на никотински и тутунски производи, како и да даде поддршка за мерките кои водат кон поздрава, побезбедна и посовесна заедница.