ЛЕГЕНДАТА СЕ ВРАЌА И ПИШУВА ИСТОРИЈА Венус Вилијамс со 45 години ќе игра на УС Опен
Легендарната Американка доби специјална покана од организаторите и ќе биде највозрасната тенисерка на турнирот во последните четири децении.
Седумкратната Грен слем шампионка Венус Вилијамс на 45-годишна возраст ќе се појави на претстојниот УС Опен, потврдија организаторите на турнирот. Американката доби специјална покана и ќе стане највозрасната тенисерка која настапила на овој турнир од 1981 година, кога Рене Ричардс играше со 47 години.
Венус Вилијамс има освоено вкупно седум поединечни Грен слем титули, од кои две на терените на „Флешинг Медоу“ во Њујорк, во 2000 и 2001 година. Во кариерата таа освои и 14 Грен слем титули во двојки со својата сестра Серена, како и две титули во мешани двојки.
УС Опен оваа година започнува на 24 август, а како вовед во големиот настан, на 19 и 20 август ќе се одржи натпреварувањето во мешани двојки во нов, ревидиран формат, со кој организаторите сакаат да ја зголемат привлечноста на турнирот.