„ЛАЖНИОТ ПАТРИОТИЗАМ НА ДУИ СЕ ДОКАЖА“ Артан Груби ставен на црна листа на САД, велат од ВМРО-ДПМНЕ

Ставањето на поранешниот вицепремиер Артан Груби и судијата Енвер Беџети на црната листа на САД е доказ за, како што велат, „лажниот патриотизам“ и партизирањето на државата од страна на ДУИ, велат преку соопштение од ВМРО-ДПМНЕ.

„Со ова се потврдува дека судството во Македонија е под силно влијание на политиката. Енвер Беџети, судијата кој случајот за Мијалков го држеше во фиока, е уште еден пример за партизираноста на институциите“, се наведува во соопштението.

ВМРО-ДПМНЕ истакнува дека членовите на ДУИ, поддржани од Артан Груби, полека завршуваат на црната листа на САД, што претставува, според партијата, „срам за државата“.

Партијата посочува дека ваквите случувања се доказ за потребата од итни реформи во судството и правниот систем, како и за одговорност од сите кои се вмешани во корупција и злоупотреба на функциите.

Исто така партијата реагираше со серија прашања упатени до опозициските партии СДСМ и ДУИ.

„Артан Груби е ставен на црната листа на САД заради сомнежи за криминал во време кога Венко Филипче беше министер во истата влада. Прашањето е, дали раководството на ДУИ ќе се огради од Груби? И дали СДСМ ќе ја поздрави одлуката на Стејт департментот?“, стои во соопштението на ВМРО-ДПМНЕ.

Партијата потсетува дека ДУИ веќе има двајца функционери на американската црна листа – Рамиз Мерко и Артан Груби – што, според нив, ја потврдува длабоката криминализација на партијата.

„Али Ахмети треба да ја погледне вистината и да признае дека ДУИ е високо криминализирана. Ќе го постави ли некој прашањето до кога вака?“, прашуваат од ВМРО-ДПМНЕ.

Оттаму посочуваат дека Владата, предводена од нив, секогаш инсистирала на борба против корупцијата во судството, и дека ставањето на функционери на ДУИ на црната листа е доказ за нејзината партизираност.