Кузеска: Сите да покажеме одговорност во борбата против коронавирусот, да го заштитиме јавното здравје

Состојбата со коронавирусот значително се влошува, кај нас и во светот. Есенскиот бран се засилува и потребно е секој еден од нас да ги почитува постојните мерки за заштита, односно да носиме маска, да држиме дистанца и редовно да ги миеме и да ги дезинфицираме рацете, вели портпаролот на СДСМ, Богданка Кузеска.

– Согласно новонастанатата ситуација, Владата прифати нови мерки кои ги предложи Комисијата за заразни болести, и веќе се во собраниска процедура и се очекува во најкус рок Собранието да ги изгласа. Со овие предлог мерки, носење маски на отворено ќе стане задолжително, ќе се забрани групирање на повеќе од 4 лица на отворено, како и домашни посети на повеќе од 4ца гости во едно домаќинство – вели портпаролката.

Таа додава дека доколку бројот на заразени расте, Комисијата за заразни болести веќе утре, до Владата ќе предложи дополнителен пакет рестриктивни мерки.

– Ограничување на капацитетот на луѓе во јавниот превоз до 50%, целосна забрана за секакви настани, и крај на работното време на сите економски оператори, субјекти во 23 часот – вели Кузеска.

Таа истакна дека здравствените работници не можат сами. Во ова борба мора да се вклучат сите со тоа што ќе се почитуваат мерките без исклучок.

– Се работи за вашето здравје, за здравјето на вашите пријатели, колеги, на вашите најблиски. Мора сите да бидеме свесни, совесни и одговорни. Во битката против ковид 19, ќе се вклучат и студентите од шестта година по општа медицина. Овие идни здравствени работници ја препознаа својата важна општествена улога во моменти на криза. Да ја препознаеме и ние нашата, да се заштитиме и себе си, луѓето околу нас, да го заштитиме јавното здравје – вели портпаролката.