Курц: Ќе се залагаме во првата половина од годинава да почнат пристапните преговори со С Македонија

Австрија во потполност го поддржува европскиот пат на целиот Западен Балкан и ќе се залага за започнување пристапни преговори со С Македонија и Албанија во првата половина на оваа година. Наш стратешки интерес е да го внесеме регионот во ЕУ што е можно побрзо, изјави австрискиот канцелар Себастијан Курц во интервју за белградскиот магазин КорД, јави дописникот на МИА од Белград.

Тој изрази посебно жалење што С Македонија, како „примерен-кандидат“, сè уште ги нема отворено пристапните преговори со ЕУ.

– Австрија ќе се залага за започнување на долго задоцнетите преговори за членство со С Македонија и Албанија во првата половина на 2021 година – додаде Курц.

Србија, пак, истакнува тој, има единствена одговорност да покаже дека Западен Балкан напредува по својот европски пат со значително забрзување на сопствените реформски напори и постигнување на конкретни и опипливи резултати во владеењето на правото и другите основни области.

– Постојаниот ангажман со добра волја во преговорите и постигнување на сеопфатен и правно обврзувачки договор за нормализирање на односите (со Косово) е клучно за напредок на европскиот пат – кажа Курц.

Тој исто така изјави дека Австрија останува пријател на Западен Балкан и во време на кризата и дека поддршката на регионот во борбата против пандемијата со ковид-19 е нејзин главен приоритет.

Канцеларот потсети дека Австрија неодамна ветила 2,4 милиони евра за иницијативата КОВАКС, додека ЕУ одлучи да стави на располагање 70 милиони евра за вакцините за Западен Балкан.