Купете албум, поддржете ги музичарите – нов предизвик на убаво и корисно

Градоначалникот на Скопје, Петре Шилегов, меѓу првите се одзва на повикот на музичарот Тони Зен со купување музички албуми да се поддржат музичарите кои веќе една година немаат настапи поради пандемијата со коронавирусот. Шилегов ја прошири иницијативата на Тони Зен со објавување онлајн предизвик и први ги номинираше Коста Петров, Радмила Шекеринска и Јани Макрадули.

„Неодамна решив да преземам одговорност за моите музички албуми и концертни изданија и самиот да ги продавам онлајн, воедно и да ги дистрибуирам лично до сите вас. Целта ми беше да се подигне свеста кај публиката, но и кај самите автори, дека е потребна меѓусебна соработка и поддршка во овие тешки и кризни моменти, но, исто така е потребно да се има почит и разбирање, и не само сега, туку секогаш. Бидејќи со купување музички албум, цеде, плоча, касета, со купување книга, фотографија, уметничка слика, со купување карта за било каков настан итн., вие ги поддржувате македонските автори од било која област и на тој начин ние опстојуваме. Да нема публика, нема да постоиме“, напиша Тони Зен во својата објава на Фејсбук.

Тој вели дека не очекувал дека ќе има толку голем одзив и заинтересираност на неговиот повик. Меѓу првите кои нарачале да си купат албум или цела дискографија бил и градоначалникот Шилегов, кој пак ја прошири иницијативата со објавување онлајн предизвик #ЛокаленМузичкиПредизвик.

„Од мојот пријател Тони Зен на подарок добив два негови албума па тоа ме натера да се потсетам на времето кога активно собирав плочи и се гордеев на мојата колекција. Во деновите кога задолжително седиме дома, а локалните музичари имаат многу помалку ангажмани, е идеална прилика да поддржиме домашна музика и да им помогнеме на овие наши сограѓани.

Затоа, денеска набавив три изданија на македонски музичари и им ги испратив на Коста Петров, Шекериска и Јани Макрадули, за да ги повикам да учествуваат во #ЛокаленМузичкиПредизвик и да го прошират кругот, подарувајќи им музички изданија на своите колеги и пријатели, а со тоа да им помогнат на локалните музичари во продажбата на своите албуми“, напиша Шилегов.

На неговиот предизвик, вчера одговори Шекеринска, која им подари музички изданија во домашна продукција и ги номинираше Мила Царовска, Дамјан Манчевски и Јана Белчева.

„Со задоволство ќе уживам во албумот ‘Underground evergreens’ на нашата музичка група Суперхикс, што ми го испрати Петре Шилегов во рамки на #ЛокаленМузичкиПредизвик“, напиша Шекеринска.

Тони Зен вели дека до некаде целта му е остварена, но дека треба уште многу да се работи, за да се продолжи соработката и меѓусебната поддршка за, како што вели, полесно да поминеме низ ситуацијава во која сите се наоѓаме.

Тој се заблагодарува на сите за поддршката и замолува оваа негова иницијатива да биде поштедена од судови, етикетирања, шпекулации, идеи и приказни.