Кунгуловски: Британскиот сој на коронавирусот е за 35 отсто посмртоносен од другите
Докторот ги објави најновите осзнанија за британската мутација на коронавирусот според извештајот на NERVTAG, сојот полесно се пренесува за најверојатно 50-70%, односно, ако требало да се заразат 1.000 луѓе, ќе се заразат 1500-1700.
Д-р Горан Кунгуловски од Лабораторијата за генетика и персонализирана медицина при Клиниката „Жан Митрев“, на својот фејсбук профил ги објави најнови сознанија поврзани со британската мутација на коронавирусот.
Еве кои се новите информации:
1. Според извештајот на NERVTAG во Велика Британија, сојот полесно се пренесува за најверојатно 50-70%, односно, ако требало да се заразат 1.000 луѓе, ќе се заразат 1500-1700. Значајно.
2. Според извештајот на NERVTAG во Велика Британија, сојот најверојатно води до поголема смртност, барем за 35% во споредба со небритански соеви.
3. Ако има зголемена преносливост (да речеме 50%) и зголемена смртност (да речеме 35%) наместо да се заразат 1.000, ќе се заразат 1.500 и наместо да починат 10, ќе починат 20.
4. Тековните вакцини се доволно ефективни кон британскиот сој.
Кунгуловски вели дека пандемијата е далеку од завршена и единствениот спас е глобалната вакцинација, што побрзо толку подобро.
– Дотогаш, следете мерки, носете маски, не престојувајте во непроветрени простории, не престојувајте во затворени простории подолго време, бидете разумни, не мислете само на себе туку мислете и на останатите околу вас. Паниката не користи никому, додека пак разумна претпазливост и мониторинг користат секому – препорачува Кунгуловски.