„КУМАТА НА ХАОСОТ НА ЈАВНИОТ ПРЕВОЗ ГО ДОВЕДЕ СКОПЈЕ НА РАБ НА КОЛАПС“ Советниците од ВМРО-ДПМНЕ се спремни да го поддржат предлогот за нови автобуси

Самопрогласенаата реформаторка на јавниот сообраќај повторно успеа да го доведе Скопје на раб на колапс, соопшти партијата ВМРО-ДПМНЕ.

„Неспособната Арсовска, која е и кума на хаосот со јавниот превоз, глуми загриженост за проблемите што сама ги создаде, додека, пак, граѓаните се сведени на улога на пасивни спонзори на проектот ‘Како да се троши без отчетност’. Наместо да излезе пред советниците со план за набавка на нови автобуси, таа повторно магично исчезна. Каде се парите од Град Скопје? Каде се ветените решенија? Одговорите остануваат зад затворени врати каде што се носат одлуките“ се вели во соопштението на партијата.

Арсовска, ако воопшто има некаква грижа на совест за граѓаните, се истакнува во соопштението, треба конечно да покаже вистинска отчетност.

„Доколку таа е подготвена на тоа, тогаш советниците од ВМРО-ДПМНЕ во Град Скопје се подготвени да го поддржат предлогот за нови автобуси. Во спротивно, ова апокалиптично сценарио на коешто скопјани се принудени да се адаптираат секојдневно, ќе продолжи. Пешачењето со километри и доцнењето на работа станаа секојдневие затоа што неспособноста на Арсовска го сведе јавниот превоз на мисловна именка“, соопшти ВМРО-ДПМНЕ.