Костадинов: ВМРО-ДПМНЕ да не бара алиби за блокадите за нов Клинички центар

ВМРО-ДПМНЕ предводена од Христијан Мицкоски е против нов Клинички центар, против подобри здравствени услуги за граѓаните, обвини пратеникот и портпарол на СДСМ, Костадин Костадинов.

– Ставот на Мицкоски дека по секоја цена ќе го кочи законско решение со кое државата по 80 години ќе добие нов модерен Клинички центар е признание дека ВМРО-ДПМНЕ е цврсто застаната на спротивната страна од интересите на граѓаните, дека е цврсто застанат против здравствениот систем во нашата земја. Тврдењата дека во соседна Србија се изградил ист Клинички центар за далеку помала сума се тешка лага и обид за манипулација на јавноста. Не држи тоа алиби на Мицкоски и ВМРО-ДПМНЕ за сето ова што им го прават на граѓаните и државата. Клиничкиот центар во Белград е само една зграда, кула изградена поодамна која сега е затворена и опремена. Клиничкиот центар во Скопје е цел комплекс со придружни објекти и претставува цел медицински град. Тоа е огромна разлика која Мицкоски свесно ја игнорира за да бара алиби за неговите срамни обиди да ја спречи најголемата капиталната инвестиција во македонското здравство. Додека СДСМ и парламентарното мнозинство прават сè за да го унапредат квалитетот на живот, Мицкоски и пратениците на ВМРО-ДПМНЕ прават сè за да бојкотираат, блокираат, ги кочат важните законски решенија – рече Костадинов на денешната прес-конференција.

Наместо за граѓаните и државата, додаде тој, пратениците на ВМРО-ДПМНЕ работат за интересите на Мицкоски.

– Таквото деструктивно, антинародно и антидржавно однесување е препознаено од граѓаните, затоа ВМРО-ДПМНЕ и  Христијан Мицкоски се постојано поразувани, затоа ќе бидат поразени одново и одново. Граѓаните треба да знаат дека и со и без ВМРО-ДПМНЕ, државата ќе добие нов модерен Клинички центар кој ќе им пружи интегрирани здравствени услуги на сите граѓани – рече Костадинов.