Костадинов: Создадени се услови за избори во втората половина на јуни

Создадени се услови за одржување на избори во втората половина на јуни, што е потврдено и од здравствените власти, но и од позитивниот одговор на ОБСЕ/ОДИХР дека се подготвени да продолжат со набљудувачката мисија, порача портпаролот на СДСМ, Костадин Костадинов, денеска пред лидерската средба кај претседателот Стево Пендаровски.

– Од здравствен, од економски и демократски апсект одговорно е парламентарните избори да се одржат во првиот можен рок. Веднаш штом условите го дозволуваат тоа, согласно препораките на здравствените институции. Очекуваме дека денеска, на средбата кај претседателот Стево Пендаровски, претседателите на партиите на прво место ќе го стават интересот на граѓаните и државата. Да нема неодговорност, да нема бегање, граѓаните да се стават на прво место. Само на тој начин може да се постигне договор за конкретен датум за одржување на изборите кои беа одложени заради здравствената криза – рече тој.

Костадинов го повтори ставот на СДСМ избори да се одржат во првиот можен рок.

– За да го зачуваме здравјето на граѓаните и да не ги изложиме граѓаните од нов здравствен ризик наесен, кога се очекува нов бран од вирусот. Светската здравстена организација денеска предупредува токму на тоа. Затоа треба да се оди на избори кога условите најмногу ги дозволуваат, секако со целосен протокол за заштита на граѓаните. Дополнително, економијата која е во фаза на трансформација и рестартирање да не ја запреме со изборен процес наесен. СДСМ нема да дозволи никој, ниту пак еден неодговорен политичар како Мицкоски, да ги попречи демократските процеси и вештачки да создаде криза – порача Костадинов.