КОРУПЦИЈО, ИМЕТО ТИ Е МАКЕДОНИЈА! Таа го дели општеството и ги иселува младите во странство

Борбата против корупцијата е тежок процес кој бара колективна акција, но и покрај силните заложби на антикорупционерите, политичките влијанија, неказнивоста и злоупотребата на дискреционите овластувања на одредени политички елити се уште претставуваат горлив проблем кој можат да доведат до висок ризик од корупција, изјави претседателката на Антикорупциската комисија, Билјана Ивановска, по повод на денешниот Меѓународен ден за борба против корупцијата.

– Се уште сме сведоци на партиски пазарења за високи раководни позиции, кои инаку треба да се пополнат преку јавни огласи, фер конкуренција и мерит систем. Сведоци сме на смена на директори поради политички реваншизам, на вработувања по познати шеми на непотизам, клиентелизам и кронизам – изјави таа.

Корупцијата е една од главните причини и за се поизразените поделби во македонското општество, изјави денеска претседателот Стево Пендаровски по овој повод.

– На вертикално ниво, корупцијата ја зголемува социјалната и економска нееднаквост бидејќи им овозможува на корумпирани поединци и групи да акумулираат средства на сметка на другите. Истовремено, таа создава и хоризонтална поделба меѓу самите граѓани, меѓу оние кои можат да си дозволат поткуп за некоја услуга и оние кои тоа не можат да си го дозволат. Корупцијата го забрзува и иселувањето бидејќи практично го поништува системот на заслуги при вработување и унапредување. Соочени со ваква бесперспективност многу млади и квалификувани кадри едноставно си заминуваат во држави каде што постојат поинакви критериуми за напредување и наградување – рече тој.

Со сите нејзини варијации и мутации, од мито, преку непотизам, кронизам, клиентелизам, корупцијата е природна средина за организираниот криминал, рече Пендаровски и додаде:

– Високото ниво на корупција во релација со ниското ниво на доверба во институциите на државата ја зголемува несигурноста на граѓаните. Ако, на пример, граѓаните немаат доверба во полицијата или во правосудството, потешко ќе се одлучуваат да пријават корупција и криминал и да соработуваат со институциите.

Судскиот совет, пак, ги повика граѓаните да пријават случаи на корупција во судството, за што пред неколку месеци е оформена посебна комисија која има обврска да ги анализира пријавите за корупција и да постапува по нив.

– Судскиот совет изразува подготвеност да им излезе во пресрет на сите кои се соочиле со случај на корупција во судовите и затоа ги охрабрува граѓаните, наместо да станат дел од коруптивно однесување, да ги пријават оние за кои имаат сознанија дека личните финансиски интереси ги ставаат пред законите и правдата – се вели во соопштението од Судскиот совет.

Во анкетата на МЦМС, дури 80 отсто од испитаниците одговориле дека желбата за брзо богатење на оние кои се на власт влијае на широката распространетост на корупцијата, а како најкорумпирани, најголем број од граѓаните ги посочиле судиите, министрите, пратениците и обвинителите.