КОРОНАТА КОСИ НА СВЕТА ГОРА Монаси-антиваксери, 40 починале, 1.000 заболеле

Најмалку 40 монаси на Света Гора починале од ковид-19, од вкупно 1.800 монаси, околу 1.000 се разболеле, а само 500 се вакцинирани, пишува грчкиот весник „Та неа“, јави дописничката на МИА од Атина.

Игуменот од еден од манастирите, архимандритот Вартоломеј за весникот вели дека проценките се дека повеќе од 40 монаси починале од ковид-19, од кои двајца вчера. Тој додава дека некои монаси се хоспитализирани и приклучени на апарати на интензивна нега.

Весникот пишува дека еден манастир е во карантин, два-три манастира превентивно се затворени за верниците, а меѓу постојаните жители на Света Гора има и 400 монаси од Србија, Романија, Бугарија и од Русија, кои категорично одбиваат да се вакцинираат и кога дел од нив се разболеле, побарале лекари од Белград, бидејќи не сакале лекување од грчки лекари.

Според „Та неа“, но и според написите во грчките медиуми од изминатиот период за време на пандемијата, на Света Гора постојат постари монаси кои се категорично против вакцинација и се најгласни меѓу антиваксерите, а воедно ги советуваат и верниците кои ги посетуваат дека не треба да се вакцинираат.

По изјавите на монах од Света Гора дека постојат монаси-антиваксери кои со нивната реторика ги повикуваат верниците да не се вакцинираат и се одговорни за многу смртни случаи, пред неколку дена реагираше Обвинителството во Солун и покрена истрага за евентуално ширење лажни вести.