КОМПАНИЈАТА „ГОЛД АПОЛО“ ДЕМАНТИРА ДЕКА ПРАВЕЛА ПЕЈЏЕРИ ЗА ХЕЗБОЛАХ Еве од каде се набавени 5.000 пејџери за либанската организација

Тајванската компанија „Голд Аполо“ (Gold Apollo) се огласи по експлозијата на пејџери во Либан. „Голд Аполо“ наведува дека пејџерите, кои беа користени во вчерашните детонации во Либан, не се произведени од оваа компанија, туку од европски дистрибутер со лиценца за користење на брендот.

Според анализа на фотографиите од уништените пејџери, форматот и етикетите се конзистентни со пејџерите направени од „Голд Аполо“.

Претседателот на „Голд Аполо“, Хсу Чинг-Хуанг рече дека дистрибутерот, кого тој не го именува, воспоставил врска со компанијата пред три години.

Европската компанија првично увезуваше само други производи за пејџинг и комуникација на „Голд Аполо“, а подоцна тие изразија желба да направат сопствен пејџер.

Некои медиуми објавија дека компанијата која ги произвела пејџерите има седиште во Унгарија.

Првиот човек на компанијата Gold Apollo објасни дека „компанијата со седиште во Унгарија ги дизајнирала и произведувала пејџерите“, пишува Blick.

„Според договорот, ја овластуваме BAC да ја користи нашата трговска марка за да ги продава производите во одредени региони, но дизајнот и производството целосно се управувани од BAC“, изјавија од „Голд Аполо“.

Моделот AR-924 споменат во медиумските извештаи, исто така, го произведува и продава BAC.

Висок либански функционер за безбедност изјави дека Хезболах нарачал 5 илјади пејџери од „Голд Аполо“.