КОМОРАТА ГИ ПОВРЗА БИЗНИСИТЕ СО СТОТИНА НЕВРАБОТЕНИ РОМИ Во приватниот сектор се вработиле 420 Роми
Увозот на работна сила во земјава не се покажа како најдобро решение, а недостигот на работна сила е еден од клучните проблеми со кои се соочуваат компаниите поради што трпи и целата македонска економија, рече Наташа Јаневска од Стопанската комора.
Претставници на 25 компании членки на Стопанската комора денеска директно разговараа и интервјуираа околу 130 невработени Роми во рамки на Саемот за вработување организиран од Ромалитико во соработка со Стопанската комора на Македонија.
– Ромалитико за првпат организира ваков саем како уникатна можност да ја помогнеме вработливоста кај ромската заедница. Целта на настанот е ромската заедница денеска да има директни интервјуи со приватните компании со цел лицата побрзо да се вработат – изјави извршниот директор на Ромалитико, Елвис Шакири пред почетокот на Саемот за вработување што денеска се одржува во Скопје.
Ромалитико во изминатиот период успеало да поврзе околу 420 невработени Роми со компании од приватниот сектор.
Претседателката на Советот за унапредување на квалитетот на тренингот и обуките при Стопанската комора, Наташа Јаневска рече дека увозот на работна сила во земјава не се покажал како најдобро решение и додаде дека токму недостигот на работна сила е еден од клучните проблеми со кои се соочуваат компаниите поради што трпи и целата македонска економија.
– Стопанската комора, која сака да го привлече работоспособното население во нашата држава, токму затоа организира вакви саеми за да можат компаниите да ги надополнат работните места со стручен кадар. Саемот треба да претставува можност и за останатите компании да дојдат до побрзо вработување на лицата кои се на располагање во нашата држава, а со тоа да придонесеме за поголема продуктивност на компаниите и на македонската економија – рече Јаневска.
Покрај саемите, Стопанската комора работи и во делот на дуалното образование за подготовка на стручен кадар со побрза вработливост, но и преку Советот за унапредување на квалитетот на тренингот и обуките се труди да обезбеди побрз и поефикасен начин на вработување преку преквалификација, доквалификација и обука на невработените лица.
– Како Стопанска комора често размислуваме како да им помогнеме на македонските компании и нашата цел е преку ваквите саеми и преку обуките за преквалификација и доквалификација да им помогнеме ним и на македонската економија во целост. Се обидуваме да најдеме кадар за преквалификација и доквалификација со посредување на Агенцијата за вработување, но често ни се јавуваат и поединечни лица и врз основа на тоа ние организираме обуки на барање на компаниите. По завршување на обуките компаниите имаат можност да ги вработат лицата кои ги посетувале – потенцира Јаневска.
Преку програмите на УСАИД 420 Роми се вработиле во приватни компании или преку грантови за самовработување.
– Соработката е клучна за напредок. Денеска ги поздравувам „Ромалитико“ и Стопанската комора на Северна Македонија за поврзувањето на Ромите, кои бараат работа со инклузивни работодавци како што е корпорацијата „Лаер“, што вработи над 200 Роми, вклучително и во лидерски улоги – рече претставничката на канцеларијата на УСАИД во Северна Македонија, Џери Дајбл на отворањето на Саемот за вработување во Скопје во организација на Стопанската комора и „Ромалитико“.
Таа потсети дека благодарејќи на партнерствата меѓу Владата на Северна Македонија и меѓународните организации, повеќето од Ромите без државјанство, сега имаат изводи од матичната книга на родените – отклучувајќи пристап до образование, здравство и до работа.