КОЈ ШИРИ ЛАЖНИ ВЕСТИ ЗА ПРОЕКЦИИТЕ НА ММФ ЗА МАКЕДОНИЈА? Препукувања меѓу ВМРО-ДПМНЕ и СДСМ
Македонија е на дното на Западен Балкан, тврди опозициската партија. Ќе бидеме први во регионот, се фали СДСМ. Оди најди им го крајот...
СДСМ се фали со економски резултат кој што е најнизок во регионот. Меѓународниот монетарен фонд потврди дека и Косово и Албанија и Црна Гора се пред Македонија, нивните економии се подобри и за 50% во однос на растот, тврди ВМРО-ДПМНЕ.
„Македонија, согласно со последните проекции, ќе има и понизок раст на БДП од сите земји во Западен Балкан, а во исто време граѓаните ќе ги осиромашува и високата инфлација која исто така е една најголемите во Европа. Впрочем, за тоа говори и признанието на Битиќи, кој кажа дека храната и основните производи во Македонија се поскапени за 46%, додека во Европа пораснале само за 11 %. Ова е уште еден доказ дека кај нас стандардот паѓа 4 пати побрзо отколку во останатите држави“, се вели во соопштението на опозициската партија.
Дека состојбите не се подобруваат како што сака владата да ги претстави покажува и прогнозата на ММФ дека Македонија оваа година ќе ја заврши со инфлација од околу 10%,, што е речиси двојно повеќе од проекциите на Владата дека инфлацијата ќе биде 5,6%.
„Инфлацијата во Македонија во моментов е за 50% повисока од таа во Еврозоната, тоа е јасен показател дека не е увезена, туку последица на неспособноста на Ковачевски. Нема лош резултат со кој Македонија со Ковачевски не е прва“, се вели во соопштението.
СДСМ се огласи со соопштение во кое тврди дека Меѓународниот монетарен фонд ја покачи проекцијата за раст на македонската економијата на 2,5 проценти.
„И тоа е факт. ДПМНЕ не кажува дека дека токму според ММФ ќе имаме подобар економски резултат од Србија, Бугарија и од Словенија во регионот, а на исто ниво со Грција. Исто така, растот на БДП во земјава ќе биде за 1,8 процентни поени повисок во однос на просекот на ЕУ, додека за Германија се предвидува рецесија. Бидејќи станува збор за нашите најголеми трговски партнери, тоа дополнително укажува на отпорноста на домашната економија“, се вели во соопштението на СДСМ и оценките на ВМРО-ДПМНЕ се нарекуваат „лажни вести“.