КОЈ ЌЕ ОДГОВАРА ЗА НОЖЕВИТЕ И ЗА ДРОГАТА ВО ЗАТВОРОТ? Тупанчевски вели дека никој нема да биде поштеден

Никој нема да биде поштеден од одговорност по спроведената координирана акција на повеќе институции во Казнено-поправната установа-КПУ „Идризово“ каде вчера беа претресувани 25 ќелии и се пронајдени мобилни, ножеви и дрога, соопшти денеска министерот за правда Никола Тупанчевски.

Тој заедно со директорот на Управата за извршување на санкции Марјан Спасовски информираше за акцијата која била спроведена вчера наутро во шест часот од четири институции, а при претресите биле пронајдени поголема сума пари од законски дозволените кои осудените лица можат да ги поседуваат во различни валути и апоени, 50-тина мобилни телефони, компјутерска галантерија, 37 ножеви и повеќе други остри предмети, дрога во прашкаста, течна состојба и таблетки и други предмети.

– Првичните резултати од акцијата се дека се направи добра проценка и уште еднаш се реагираше на начин на којшто всушност би требало да биде, како во иднина треба да се реагира доколку се појават такви девијантни однесувања. Се разбира никој нема да биде поштеден од одговорност. Се работи за количина на мобилни телефони, ладно оружје итн. Без оглед на сѐ, зборуваме за затворска популација и за казнено-поправна установа од затворен тип. Само по себе тоа подразбира одговорност, не станува збор за некаква дисциплинска повреда и не се работи за некоја лесна форма на криминалитет. Меѓутоа, да оставиме тоа да го завршат институциите коишто се надлежни – истакна Тупанчевски.

Министерот информира и за извештајот на Комитетот за превенција за заштита од тортура, при Советот на Европа чии претставници пред десет дена при посетата на нашата земја констатирале дека не се најсјајни условите во казнено-поправните установи.

– Укажувањата на Комитетот за заштита на превенција, меѓу другото, беа дека треба да се интервенира во казнено-поправните установи во делот на менаџирање на затворите. Укажувањето беше дека има одредени лица коишто се именувани, а не ги исполнуват условите да бидат на одредена позиција – појасни Тупанчевски.

Забелешката била прифатена и Министерството за правда заедно со другите надлежни институции веќе почнало да ги отстранува недостатоците коишто претставуваат непочитување на некоја одредба од позитивните законски прописи.

Директорот Спасовски нагласи дека е направен неселективен претрес во повеќе одделенија во 25 простори на затворот и дека сѐ уште постојат индиции дека има мобилни телефони.

– На редовно ниво се вршат претреси на одредени ќелии, меѓутоа станува збор за најголем затвор и не е можно во една акција да бидат опфатени сите ќелии – истакна Спасовски.

Тој појасни дека претресот бил со наредба на обвинител и бил наменет за влез во 25 ќелии и точно таргетирани лица.