Клуге: Вакцините во Македонија ќе стигнат за неколку недели
Владата на Република Северна Македонија стори сè што требаше, не само за вакцините, туку и за подготвеноста на здравствениот систем, да обезбеди соодветна обука и опрема, рече регионалниот директор за Европа на СЗО.
Вакцините преку Ковакс системот во Македонија ќе стигнат за неколку недели, вели Ханс Клуге, регионален директор за Европа на Светската здравствена организација во интервју за Телма.
Но тој не кажува конкретен датум, се додека УНИЦЕФ и произведувачот не го договорат транспорот на вакцините. Ханс Клуге вели дека е потребно да се има трпение бидејќи сите земји во светот се соочуваат со недостаток од вакцини.
– Владата на Република Северна Македонија стори сè што требаше, не само за вакцините, туку и за подготвеноста на здравствениот систем, да обезбеди соодветна обука и опрема. И нарачката за Северна Република Македонија веќе е направена затоа сега се работи за неколку недели. Во контакт сум со седиштето на УНИЦЕФ како и со регионалната канцеларија да се стори се што е возможно да се забрза процесот – истакна Клуге.
Тој прогнозира дека уште оваа година ќе се справуваме со пандемијата, но за разлика од лани, како што вели, оваа година ќе можеме подобро да ја контролираме и менаџираме.