КИНА СОЗДАВА МЕГАГРУПА ЗА ПРОИЗВОДСТВО НА БРОДОВИ Конкуренцијата веќе не може да ја следи

Кина заврши уште еден стратешки потег што ја зајакнува нејзината позиција како светски лидер во бродоградбата. Ги спојува двете најголеми државни компании – Кинеската државна корпорација за бродоградба (CSSC) и Кинеската корпорација на индустријата за бродоградба (CSIC) со што се создава  мегагрупа која ќе има огромна предност во производството на комерцијални и воени бродови.

По консолидацијата, новата компанија ќе има околу 56 милијарди долари средства и ќе генерира 18 милијарди долари годишни приходи, според проценките што одат уште повисоко во кинеските медиуми.

Обединетиот гигант ќе има огромни ресурси – од бродоградилишта и фабрики до истражувачки институти – под директен надзор на политичките и воените структури во Пекинг.

-Кога сè ќе се каже и направи, CSSC ќе биде најголемата јавно котирана бродоградбена компанија во светот со голема разлика, и во однос на средствата и приходите – рече Метју Фунаиоле, виш соработник во Центарот за стратешки и меѓународни студии (CSIS).

Кина произведува повеќе од 50 % од светската комерцијална бродоградба, додека Јапонија и Јужна Кореја се далеку зад себе. На почетокот на 2025 година, таа имаше дури 62% од глобалната книга на нарачки за трговски бродови, вклучувајќи 80% од контејнерските бродови и 30% од бродовите за течен природен гас, што е клучно за светската трговија.

Еден од најважните аспекти на оваа консолидација е таканаречената кинеска стратегија – воено-цивилна фузија. Комерцијалните и воените бродови се градат на истите пристаништа и со истите работници, што овозможува брзо пренасочување на капацитетот во корист на војската.

Иако бројот на активни кинески бродоградилишта се намали од повеќе од 300 во 2009 година на околу 150 денес, производството истовремено драматично се зголеми во 2023 и 2024 година. Најголемите бродоградилишта во Шангај, Гуангжу и Далиан произведуваат комерцијални бродови во импресивни серии, а истовремено произведуваат воени фрегати, разорувачи и подморници.

Консолидацијата на кинеската бродоградба предизвикува загриженост во Вашингтон, Токио и Сеул. Јужна Кореја и Јапонија, некогаш водечки бродоградители, сега мора да сметаат на супериорноста на Кина во технологијата, капацитетот и владината поддршка.

Соединетите Американски Држави се соочуваат со уште поголем проблем – нивната бродоградба одамна ја изгуби глобалната трка, а дури во последниве години почнаа да се појавуваат иницијативи за нејзино обновување. Американскиот претседател Доналд Трамп ја нагласи ревитализацијата на бродоградбата како приоритет, а соработката со јапонските и корејските компании се повеќе се дискутира.