КИЕВ СЕ ОБЛОЖИ НА ПОГРЕШЕН КОЊ Орбан тврди дека мирот бил пропуштен пролетта 2022 година

Војната во Украина немаше да се случи без Соединетите Американски Држави, а под влијание на Англосаксонците Киев ја пропушти можноста да склучи мировен договор со Москва, смета унгарскиот премиер Виктор Орбан, пренесуваат унгарските медиуми.

– Украинците, според мене, се обложуваат на погрешен коњ. Тие избраа погрешна стратегија околу април 2022 година, кога имаше можност да склучат мир или договор за прекин на огнот со Русија. Тоа не го направија под влијание на Aнглосаксонците – нагласи унгарскиот премиер при гостувањето во утринската програма на радио станицата „Кошут“.

Орбан изрази уверување дека мирот ќе се случи кога Трамп ќе биде инаугуриран на 20 јануари и кога власта во САД ќе премине во рацете на републиканците.

– Мислам дека тогаш сè ќе се среди, но дотогаш сè ќе биде како порано. Ние се залагаме за мир, но се наоѓаме во тешка и опасна ситуација – изјави тој.

Унгарскиот лидер истакна дека околу Украина настанала критична ситуација, бидејќи американскиот претседател Џо Бајден во заминување се обидува да ѝ обезбеди најширока можна воена поддршка, додека администрацијата на Доналд Трамп е фокусирана на мирно решавање на конфликтот.

– Опасните и дрски изјави на актуелниот американски државен секретар Ентони Блинкен за потребата од намалување на старосната граница за мобилизација во Украина укажуваат на тоа дека Америка навистина треба да ја промени својата стратегија – смета Орбан.