📷 КАВГА МЕЃУ ТРАЈКО И ДАНЕЛА Арсовска тврди дека немало кворум за заклучокот, Славески ја негира

Во денешното обраќање за јавноста, претседателот на Советот на Град Скопје, Трајко Славески, изрази загриженост поради, како што рече, опструкциите од страна на градоначалничката Данела Арсовска и администрацијата на Град Скопје во процесот на носење и извршување на одлуки, особено во врска со тарифите на приватните автобуски превозници.

Славески објасни дека по иницијатива на Град Скопје и по повеќечасовна расправа, Советот го усвоил заклучокот за измена на одлуката за исплата на надоместокот за изминат километар за приватните превозници. Според него, усвојувањето на оваа одлука било резултат на потребата за приспособување на тарифите на приватните превозници, бидејќи, како што истакна, од 2017 година многу работи се промениле и нивните барања се оправдани.

– Во моментот на гласањето, ја молев службата да ги изброи гласовите, но им беше забрането да го направат тоа. На крај, сам морав да ги избројам гласовите, а советниците од СДСМ објавија дека ќе го растурат кворумот, но не успеаја – изјави Славески, нагласувајќи дека одлуката била донесена со мнозинство на гласови.

Претседателот на Советот посочи дека, иако одлуката била донесена и Советот ја усвоил, заклучокот за извршување на одлуката не бил доставен до него за потпис, што според него претставува дополнителна опструкција. Тој истакна дека чека во својот кабинет веќе два и пол часа, надевајќи се дека заклучокот ќе биде доставен до него за потпис и официјално проследување до градоначалникот Арсовска.

– Јас ќе продолжам да чекам, бидејќи тоа ми е обврска. Се надевам дека ова ќе се реши и дека ќе продолжиме со извршувањето на одлуката која е донесена од Советот – заклучи Славески.

Славески во своето обраќање изрази надеж дека ќе се најде решение за проблемите кои ги имаат приватните превозници, но предупреди дека одговорноста за понатамошното извршување на одлуката сега лежи на градоначалничката Арсовска.

Стручните служби на администрацијата на Град Скопје и градоначалничката Данела Арсовска со допис до претседателот на Советот Трајко Славески, го информираат дека „заклучок гласан без кворум, со присуство на само 19 советници во салата на Советот, не може да се смета за донесен“ и, како што велат „нема да учествуваат во изготвување на незаконски акти кои се спротивни на позитивните законски прописи“.

За ваквото, како што се посочува во дописот „незаконско постапување и заканите по стручните служби“ ќе бидат известени соодветните надлежни органи и пошироката јавност.

„ По завршување на расправата, спротивно на член 87 од Деловникот на Советот на Град Скопје, без кворум односно неопходното мнозинство за работа од 23 советници, без соодветно од страна на стручните служби да биде утврден бројот на советници присутни во салата и бројот на гласови, своеволно изјавивте дека заклучок е донесен и притоа повикавте вработените во градската администрација и градоначалникот да постапуваат“, се вели во дописот од стручните служби на администрацијата на Град Скопје и градоначалникот.

Предложениот заклучок, се вели во дописот од стручните служби на администрацијата на Град Скопје и градоначалничката, е незаконски и не спроведлив.

„ Измена на вредност на надоместокот за извршени услуги во линискиот превоз на патници, не се врши со зголемување по нечија желба во висина од 30 денари како што беше сторено од Ваша страна, туку врз основа на критериуми базирани врз трошоци за гориво, бруто плата на возачи, трошоци за резервни делови, за регистрација, технички преглед и осигурување, трошоци за потрошен материјал и одржување, амортизација, сервис на возила, паркинг и разумна добивка. Секој поинаков предлог и донесување на акт е спротивно на позитивните законски прописи и подзаконски акти, а доколку реалната цена добиена согласно горенаведените критериуми е пониска од онаа која вие сте ја договориле без соодветна анализа и факти, истото ќе предизвика штета на буџетот на Град Скопје и прибавување противправна имотна корист на други лица“, се посочува во дописот.

На дописот до Трајко Славески, испратен до медиумите, потпишани се градоначалничката Данела Арсовска и секретарот Зоран Глигоров, како и надлежните од секторите од градската администрација – Сектор за правни работи, Сектор за финансиски прашања, Сектор за сообраќај, Сектор за ревизија, Сектор за јавни дејности, Сектор за планирање и уредување на просторот, Сектор за локален економски развој, Сектор за управување со човечки ресурси, Сектор за поддршка на Совет, Сектор за комунални работи, Сектор за ИТ и модернизација, Сектор за заштита на животната средина, Сектор за образование, Сектор за јавни набавки и Сектор за општи работи.

Претседателот на Советот на Град Скопје, Трајко Славески, остро ја критикуваше градоначалничката Данела Арсовска и нејзината администрација по испратениот допис до медиумите. Тој ги обвинува за намерни опструкции и предизвикување на хаос во јавниот превоз. Според Славески, администрацијата го оспорува потребниот кворум за гласањето по Заклучокот, иако присутни биле повеќе од доволниот број советници.

– Не беа 23, туку 29 членови на Советот присутни во салата за време на гласањето, како што јасно може да се види од приложените фотографии и видео записот. Дваесет и деветтиот присутен е претседателот на Советот, кој не е во кадарот – вели Славески.

Тој ја повика градоначалничката Арсовска да постапи според задолженијата утврдени со Заклучокот, додавајќи дека Советот работел со исклучителна брзина за да го реши проблемот со приватните превозници.

– Ние успеавме да закажеме вонредна седница во рок од 13 часа од поднесувањето на барањето. Очекуваме Арсовска утре да постапи соодветно, а Советот е подготвен да одржи уште една вонредна седница за време на викендот, со што ќе го решиме проблемот со приватните превозници – порача Славески.

Овие изјави доаѓаат во момент кога градот се соочува со сериозни предизвици во јавниот превоз, а несогласувањата меѓу Советот и градоначалничката дополнително ја усложнуваат состојбата за граѓаните на Скопје.

 

ДА СЕ ПРЕБРОИМЕ!

Предизвикувачите на хаосот со јавниот превоз во град Скопје, на чело со градоначалникот Арсовска, го оспоруваат потребниот кворум од 23 членови на Совет присутни во салата за време на гласањето по Заклучокот. Не 23, туку во моментот на гласање беа присутни 29… pic.twitter.com/103yUoSm6o

— Trajko Slaveski (@TSlaveski) November 29, 2024