Канадска „Магна“ ќе прави ретровизори во ТИРЗ Струга
Инвестицијата е 35 милиони евра, а ќе се вработат 300 луѓе.
Канадската компанијата „Магна“ ќе отвори фабрика во Технолошко-индустриската развојна зона во Струга во кој ќе произведува ретровизори за „Дачиа Дастер“. Според најавата во фабриката ќе работат 300 луѓе, а во план е за 10 години бројот на вработени да достигне 1.200 луѓе. Инвестицијата се проценува на 35 милиони евра.
Како што беше речено на денешната презентација на новата инвестиција, инвестицискиот циклус на „Магна“ започна во март 2021 и ќе трае до 2026 година, а објектот кој ќе се гради ќе биде со големина од околу 17.000 м2.
Производството на првите ретровизори е планирано кон крајот на 2021 година.
Компанијата „Магна“ има 160.000 вработени низ светот, присутна е во 21 земја со 350 производни погони. Бизнисот освен во Северна Америка и Европа, веќе го шири и на азискиот пазар. Во 2020 година остварила 33 милијарди долари обрт, а во 2019-та вкупно 40 милијарди.