КАМАТНАТА СТАПКА ЗА БРИТАНСКИОТ ЗАЕМ ЌЕ БИДЕ ПОНИСКА ОД 4,5% Финансиските услови сѐ уште не се докрај договорени

Вкупната каматна стапка за заемот од Договорот со Обединетото Кралство ќе биде пониска од маргината 4,5 проценти, рече премиерот Христијан Мицкоски, појаснувајќи дека ние го користиме кредитниот рејтинг на Обединетот Кралство што е трипати А, најдоброто што во овој момент може да го добиеме на пазарот.

Ова, како што нагласи Мицкоски, е она што може да го каже со сигурност од досега договореното, нагласувајќи дека финансиските услови сѐ уште не се докрај договорени и дека сѐ уште нема таков дијалог отворено со никого и кога ќе отворат тогаш ќе може да каже детали.

Прашан дали вкупната каматна стапка ќе биде во рамки на моменталните проекции за нашата држава од 4,5 до 6,5 проценти, Мицкоски рече вкупната каматна стапка би била пониска од оваа долна маргина, нагласувајќи дека сѐ уште немаат отворено таков дијалог со никого.

– Договорот е за стратешко партнерство меѓу Македонија и Обединетото Кралство и тој поминува во собраниска процедура. Во делот на финансиските аранжмани ние имаме преговори со финансиски институции од таа земја и имаме отприлика структура колку би била каматната стапка за тој заем и би кажал дека е подолу од долната маргина што ја кажавте – изјави Мицкоски, одговарајќи на новинарски прашања на прес-конференција за промоција на оперативниот план за вработување.

Но, нагласи Мицкоски, ние нема да одиме на директно потпишување договор со таа финансиска институција, туку Министерството за финансии откако ќе добие барање за проект ќе излезе на меѓународен пазар и ќе има конкурентен дијалог со 18-20 потенцијални кредитодаватели, меѓу кои и европски банки.

– Оној што е подготвен да финансира вакви проекти, со одредена конкурентна каматна стапка ќе биде избран. Не можеме од сега да знаеме дали таа финансиска институција со која преговаравме ќе биде најконкурентна. Таа ќе биде избрана само под услов да е најконкурентна, затоа не е дел од договорот, затоа што таа процедура допрва ќе се случува. И тоа ќе биде транспарентно и нема да биде скриено, нема да се носи со европско знаме и нема да биде класифицирано. Зарем мислите дека јас сум тука да дозволам држава да направи фаул или пак граѓаните да бидат ограбени. Напротив, ние добивме доверба за да ја развиваме – изјави Мицкоски.

Финансиските услови сѐ уште не се докрај договорени, нагласи Мицкоски, посочувајќи дека во случајот има петгодишен грејс период и првата фактура би доспеала 1 јануари 2027 година и од тогаш ќе стартува грејс периодот.

Прашан дали договорот предвидува соработка во безбедноста и што подразбира тоа, Мицкоски, рече дека пред две недели поминал на владина седница меморандум за разбирање меѓу Владата и британска компанија која е подготена да инвестира во еден таков производен капацитет меѓу 250-300 милиони евра, што годишно би носело од извоз околу половина милијарда евра.

– Но, имаме договор, кога ќе биде сето тоа финализирано ќе застанеме повторно на прес и ќе го кажеме тоа – изјави Мицкоски.