КАЕВСКИ ЈА ОБВИНИ ДАНЕЛА ДЕКА НЕ ПЛАЌАЛА СТРУЈА Со лаги и клевети го одработува станот, му возврати ВМРО-ДПМНЕ
Каевски денеска на прес конфернеција објави документи кои откриваат, како што рече, дека фирми на Арсовска не плаќале сметки за струја за салата Расадник, која била изнајмена од фирмата „Империал – Данела“ ДООЕЛ Скопје, понатаму „Империал ДООЕЛ увоз-извоз“ Скопје во кои Арсовска била управител и сопственик.
Дали Каевски мора да ги одработува станот и 4 милиони денари, со ширење лаги и клевети за ВМРО-ДПМНЕ и за Данела, реагира ВМРО-ДПМНЕ откако пратеникот Каевски денеска на прес конфернеција објави документи кои откриваат, како што рече, дека фирми на Арсовска не плаќале сметки за струја.
– Нејзина фирма „Империал – Данела“ ДООЕЛ Скопје, понатаму „Империал ДООЕЛ увоз-извоз“ Скопје во кои таа била управител и сопственик, со години под закуп ја има спортската сала Расадник во Кисела Вода. Но, фирмата замислете, не плаќала струја! Фирмата на Данела направила долг од 3,3 милиони денари или 54.000 евра. Данела ниту е чесна ниту е независна. Кандидатката на Груевски е иста како него. Ова почитувани граѓани е класичен пример за неодговорно, расипничко и недомаќинско работење – рече пратеникот од СДСМ Дарко Каевски денеска на прес конференција.
Тој се сомнева како Арсовска ќе управува со Градот ако, како што вели, лошо управува со една сала.
– Ако не плаќала струја, не почитувала Договор, направила милионски долгови, јасно е дека исто ќе се однесува и со парите на граѓаните, со градскиот буџет и договорите на Градот. Не може граѓаните да си ги плаќаат своите сметки а Данела на нивниот грб да се богати. Има ли Данела Арсовска и други долгови и колкави се тие? – праша Каевски.
Од ВМРО-ДПМНЕ реагираа дека Каевски треба да каже, а и ДКСК да отвори случај како тој со само 30-тина години се стекнал со стан во Скопје, за кој тврди дека чини 60.000 евра и 4 милиони денари депозит во банка.
„Тоа се вкупно над 125.000 евра за еден млад триесетгодишник. Што работа работел Каевски па на 30 години успеал да спечали 125.000 евра? Каевски само 5 години е функционер со плата од 1.000 евра. Ако се претпостави дека целата ја одвојувал на страна без да јаде или троши денар од неа доаѓаме до сума од 60.000 евра, но од каде му се другите 65.000 евра? Каевски да го каже рецептот како со 30 години се стекнува толкав имот, а ДКСК веднаш да отвори случај. Во случајот со Каевски смрди на стекнување без основ“, реагираше ВМРО-ДПМНЕ.