Каде најчесто летуваат туристите со ваучер?

Хотелите на бреговите на езерата и на планините се најпосетени од граѓаните кои добија ваучер за туризам. Од 15 јули до денеска искористени се 1.996 ваучери, велат од Министерството за економија преку кое се реализира оваа мерка на Владата.

Од хотелската асоцијација ХОТАМ, пак, велат дека 30-40 отсто од гостите на хотелите се со ваучери, што покажува дека мерката е добра. Граѓаните, иако се плашат, сепак се задоволни што можат да се одморат неколку дена на езеро или на планина и покрај пандемијата.

– Најголем интерес до сега има за хотелот „Изгрев“ во Струга, каде што се искористени 110 ваучери. Потоа следува хотелот „Дрим“ со 89 ваучери. Во Охрид 70 ваучери се искористени во хотелот „Аквалина“, а во хотелот „Тино“ искористени се 50 ваучери. Во Дојран има интерес за хотелот „Романтик“, каде што се искористени 60 ваучери и за хотелот „Полин“ со 40 ваучери. Во Берово најмногу ваучери има во хотелот „Аурора“ со 30 и во хотелот „Манастир“ со 37 ваучери – велат од Министерството за економија.

Од ХОТАМ појаснуваат дека најголем дел од гостите се домашни во хотелите на езерата кои деновиве работат со преполовен капацитет, а 30 до 40 отсто од овие туристи се со ваучерите кои ги дава државата. Во асоцијацијата очекуваат бројот на туристи со ваучери да се зголеми во наредните 15 до 20 дена, но и на граѓаните кои вообичаено летуваат во домашните туристички центри.

–  Ни недостасуваат странските гости, но во овој период, поради коронакризата, не можеме да сметаме на нив и затоа сме свртени кон домашните туристи. Има интерес за користење на ваучерите и се надеваме дека тоа ќе биде од помош за хотелските капацитети во земјава – вели претседателот на ХОТАМ,,Крсто Блажевски.

Хотелите крај езерата годинава работат со цени пониски за 30 отсто во однос на лани

– Ноќевање со доручек е 20 евра, што е доволно да се поминат 3 до 4 дена со државниот ваучер, но и на ова имаме реакции дека е скапо, бидејќи дел од граѓаните сакаат да поминат повеќе денови со семејствата. Голем дел од нив, пак, доплаќаат да поминат неколку дена повеќе одмор – вели Блажевски.

Освен за езерата, интерес кај граѓаните има и за планинските центри. Хотелите и во овие центри ги намалија цените, за да можат што поголем број на домашни туристи да престојуваат таму. Во дел од овие центри, како и секоја година, има многу домашни гости.

–  Скоро и да немаме слободно место. Дел од гостите се со ваучери, но обично кај нас доаѓаат гости кои секоја година доаѓаат да уживаат во убавините на Берово и на Малешевските Планини. Сепак, сметам дека со оваа мерка владата има полн погодок и ќе придонесе овој сектор за го помине малку подобро овој најлош период – вели сопственикот на „Аурора Ресорт & Спа“ од Берово, Славе Сирачевски.

Граѓаните, пак, се со различни ставови за ваучерите и за одморот. Факт е дека домашните туристи кои се навикнати на летување во странство, па тешко се определуваат да летуваат во земјава.

– Вообичаено одам во Грција, но годинава, поради коронава, тешко дека ќе може да се оди таму. Најверојатно ќе одиме неколку дена во Охрид или во Дојран, зашто сме научени на пливање. Пријателите со кои редовно одиме на одмор годинава нема да одат никаде, се плашат – вели скопјанка.

Други се плашат да заминат на одмор поради ширењето на коронавирусот и од високите бројки.

– Добив ваучер, добро е што државата и на ваков начин сака да ни помогне, но се плашам од ширењето на вирусот. Веројатно работат според протоколите, а ќе одиме некаде некој ден да излеземе од Скопје. Сепак, повеќе би избрала планина. Пелистер или Берово. И секако во август, пред да почне учебната година – ни изјави Ана К.