ИЗРАЕЛ ЗАПОЧНА ОБЕМНА КОПНЕНА ОФАНЗИВА ВО ГАЗА Сите болници на северот од енклавата не се во функција
Израелските власти соопштија дека плановите вклучуваат заземање и држење на територија, заедно со преместување на цивили од северниот кон јужниот дел на Појасот. Во меѓувреме, жртвите во Појасот Газа се зголемуваат. Во нападот во неделата наутро загинале околу 110 луѓе.
Израелската војска соопшти дека почнала „обемна“ нова копнена офанзива низ Појасот Газа како дел од својата засилена кампања против Хамас.
Израелските копнени трупи сега дејствуваат и во северниот и во јужниот дел на палестинската крајбрежна енклава, соопштија Израелските одбранбени сили (ИДФ).
Војската соопшти дека во текот на минатата недела спровела „прелиминарна фаза“ на воздушни напади за поддршка на копнените сили, насочени кон повеќе од 670 позиции на Хамас, вклучувајќи складишта за оружје, ракетни фрлачи и милитантни оперативци.
„Досега, трупите елиминираа десетици терористи“, се вели во соопштението.
Жртвите во Појасот Газа се зголемуваат додека Израел ја засилува својата офанзива. Во неделата, 18 мај, медицински лица соопштија дека околу 110 луѓе загинале во текот на ноќта и во неделата наутро, а многумина други се повредени.
Израелскиот премиер Бенјамин Нетанјаху неодамна изјави дека засилената кампања има за цел да го зголеми притисокот врз Хамас и да го обезбеди ослободувањето на заложниците кои сè уште се држат.
Израелските власти соопштија дека плановите вклучуваат заземање и држење на територија, заедно со преместување на цивили од северниот кон јужниот дел на Појасот.
Министерството за здравство на Хамас во Појасот Газа денеска соопшти дека сите болници на северот од палестинската енклава се надвор од функција.
„Израелската окупација ја засили опсадата“, се наведува во соопштението на министерството.
Нападите го спречуваат пристигнувањето на пациенти и медицински персонал, како испораката на медицински материјали, поради што, како што се наведива, и индонезиската болница, главната медицинска установа на северот од територијата разурната од војната, мораше да се затвори.
Набљудувачите стравуваат дека новата офанзива, наречена „Кочиите на Гидеон“ од страна на војската, ќе доведе до многу повеќе смртни случаи во крајбрежниот појас, каде што луѓето живеат во катастрофални услови.
Израелската војска од почетокот на март не дозволува помошта за Газа да биде испорачана во енклавата, обвинувајќи го Хамас дека ги препродава залихите за помош на сè посиромашното население, потсетува германската агенција.