„ИЗРАЕЛ ЌЕ ЈА ОТСЕЧЕ ТЕРОРИСТИЧКАТА РАКА НА ИРАНСКАТА ОСКА НА ЗЛОТО“ Ерусалим ќе ги напаѓа Хутите додека не ја заврши работата
Министерот за одбрана, Израел Кац, најави дека Израел ќе ги гони сите лидери на Хутите по, како што рече, „прецизните акции на израелските воздухопловни сили кои погодија стратешки цели во Јемен, на аеродромот и на пристаништето“.
Израелскиот премиер, Бенјамин Нетанјаху, денеска соопшти дека Израел ќе продолжи да ги напаѓа Хутите во Јемен додека не се заврши работата.
Во меѓувреме, агенциите ги пренесоа извештаите на телевизијата на Хутите, Ал Масира, дека во израелските напади загинале најмалку 3 лица, а повеќе од 10 се ранети.
Две лица загинаа во нападите на меѓународниот аеродром Сана во главниот град на Јемен, а уште едно лице загина во пристаништето Рас Иса. Во тие напади беа ранети 11 лица.
Шефот на Светската здравствена организација (СЗО), Тедрос Аданом Гебрејесус, исто така соопшти дека бил на аеродромот во Сана кога бил нападнат.
– Пред кратко време, воздухопловните сили ги нападнаа целите на терористичката организација Хути во Јемен, на брегот и во Сана. Решени сме да ја отсечеме таа терористичка рака на иранската оска на злото. Ќе истраеме додека не ја завршиме работата – рече Нетанјаху во видео најава од командниот центар во штабот на израелската армија во Тел Авив, пренесуваат израелските медиуми.
Тој ги надгледуваше нападите заедно со министерот за одбрана, Израел Кац, началникот на армијата, Херц Халеви, и со командантот на воздухопловните сили, Томер Бар.
Кац најави дека Израел ќе ги гони сите лидери на Хутите по, како што рече, „прецизните акции на израелските воздухопловни сили кои погодија стратешки цели во Јемен, на аеродромот и на пристаништето“.