ИСМАИЛИ Е ЧИСТ КАКО СОЛЗА Гаши му верува повеќе нему, отколку што си верува себеси

Екс-министерот за култура е чист како солза, изјави претседателот на Алтернатива, Африм Гаши вечерва во Дневникот на ТВ Сител, во однос на барањето од Антикорупциска да се покрене од страна на Обвинителството кривична постапка за поранешниот министер за култура, Хусни Исмаили, за кој постои сомневање дека ја злоупотребил службената положба и овластувања и го оштетил буџетот на државата во постизборен период.

Исмаили е дел од партијата Алтернатива и е номиниран за потпретседател на Собранието.

– Воопшто не е точно тоа, ова е многу индикативна иницијатива започната од политички структури, целосно политизирана. Јас тврдам дека Хусни Исмаили е чист како солза, јас повеќе му верувам нему отколку себеси. Така што со полна одговорност тврдам дека нема ништо неодговорно направено и нечесно тој човек. Ако се утврди нешто такво јас давам оставка од политиката – изјави Гаши.

Прашан како ќе функционираат во локалната власт, Гаши рече дека нивниот став е оти на локално ниво проблемите на граѓаните се поинакви и сакаат да останат верни на тие коалиции. Појасни дека со Алијанса за Албанците имале коалиција, додека со ВМРО-ДПМНЕ само соработка за поддршка на кандидатите во некои општини.

– Сè додека еднострано не се прекине соработката, Алтернатива ќе остане дел од тие позиции што ги имала пред локалните избори – рече Гаши.

Претседателот на Алтернатива сепак гледа и можност за повторна соработка со овие партии за некои следни избори.

– Политичките партии во Македонија не треба да се забарикадирани во политички ровови, треба да комуницираат, треба да има различни коалиции, соработка на различно ниво. Но, тоа треба да се направи врз основа на принципиелни критериуми и политики кои се во добробит на сите граѓани. Се трудам да ја подобрам политичката култура во државата, мислам дека тоа е здраво за целата политички реалност во државата и само така можеме да одиме напред. Поинаку со инсинуации, закопани во политички ровови, само ќе ја зацврстиме омразата помеѓу граѓаните, а тоа на никого не му треба – рече Гаши.

Лидерот на Алтернатива, Африм Гаши смета дека јавноста не чита сè што е напишано во договорот што го потпиша со премиерот Зоран Заев при влегувањето на партијата во Владата.

– Ние бевме јасни. Владата ќе испорача официјално барање со ЕУ, со барање за независен тим експерти за мониторинг на политички судски случаи. Не се мешаме во судството. Сакаме само независно тело да даде експертиза. Доколку експертите најдат некои доказ, треба да ги достават до македонските судски органи. Бараме само правда – вели Гаши, додавајќи дека како ќе одлучи судот, тие како партија ќе ги прифатат одлуките.

Лидерот на Алтернатива додава дека бараат само правда.

– Не сакаме во иднината судските случаи да се политизираат – додаде Гаши.

Во однос на македонско-бугарскиот спор, Гаши е оптимист дека во јануари или февруари ќе почнеме со преговори со ЕУ.

– Со нашата стабилна влада од 64 пратеници и новата влада во Софија има најава дека во јануари и февруари ќе почнеме преговори – потенцира лидерот на Алтернатива.