ИРАНСКИ ХАКЕРИ ГИ „СОГОЛЕА“ АЛБАНСКИТЕ РАЗУЗНАВАЧИ На Телеграм објавени безбедносните сертификати на вработените во ШИШ

Иранските хакери од групата „Татковинска правда” продолжуваат со објавување тајни податоци преземени по кибер-нападите врз албанските владините системи, извршени на 15 јули и на 9 септември. Денеска објавија податоци на вработените во албанската тајна служба, ШИШ, меѓу другото и нивните безбедносни сертификати и криминални досиеја.

– „Татковинска правда” ги објави податоците на мрежата Телеграм, каде се објавени 214 страници документи, јави агенцијата Балкан веб.

Ова не е првпат да се објавуваат податоци за ШИШ. Претходно беа објавени податоци за првиот човек на ШИШ, Херолинд Бендо неговиот заменик Олијан Кануши, односно лични податоци за двајцата, нивни фотографии и телефонски броеви, е- пошта, податоци за патувања.

Исто така иранските хакери објавија податоци и за претходниот генерален директор на полицијата Гледис Нано, за актуелниот Мухамет Румбулаку, за премиерот Еди Рама и повеќе министри, како и лични податоци на албански државјани, дури и единствениот избирачки список.

Нападите на иранските хакери во албанската кибернетичка мрежа и постојаното објавување мејлови и документи на високи функционери, донесе директна закана по националната безбедност, поради што владата одлучи да ги модернизира серверите на албанскиот систем за што ќе потроши 2,8 милиони евра.