ИРАН ТВРДИ ДЕКА НЕ ИСПУКАЛ РАКЕТИ ВРЗ ТУРЦИЈА Ердоган разговараше со иранскиот претседател Пезешкијан
Ердоган го изразил своето несогласување со интервенцијата врз Иран, нарекувајќи ја нелегална, но рекол дека не е исправно Иран да напаѓа трети, братски земји во регионот.
Турскиот претседател Реџеп Тајип Ердоган и иранскиот претседател Масуд Пезешкијан остварија телефонски разговор, во кој иранскиот претседател му кажа на својот турски колега дека Иран не е извор на ракетите што влегоа во воздушниот простор на Турција и дека ќе биде спроведена сеопфатна истрага за случајот, соопшти Дирекцијата за комуникации на Претседателството на Република Турција.
„Пезешкијан рече дека Иран не е извор на ракетите што влегоа во воздушниот простор на Турција и дека ќе биде спроведена сеопфатна истрага за случајот“, се вели во официјалното соопштение за телефонскиот разговор. Исто така, јасно е наведено дека тој е спроведен на барање на иранската страна.
Турското Министерство за одбрана вчера објави дека балистичка ракета лансирана од Иран влегла во турскиот воздушен простор и била соборена од воздушните и ракетните одбранбени системи на НАТО во Источниот Медитеран. Ова е втор ваков инцидент во последните денови во услови на настани на Блискиот Исток, откако Министерството, исто така, на 4 март објави дека е пресретната иранска балистичка ракета што се упатила кон турскиот воздушен простор откако го прелетал воздушниот простор на Ирак и Сирија.
Ердоган го изрази своето несогласување со интервенцијата во Иран, нарекувајќи ја нелегална и категорично изјавувајќи дека не смета дека е исправно Иран да напаѓа трети, братски земји во регионот. Турскиот претседател му рече на Пезешкијан дека тоа нема да му користи на никого и дека ваквите дејствија мора да бидат запрени.
„Претседателот Ердоган изјави дека Турција ги трпи последиците од конфликт во кој не е страна и дека без оглед на причината, влегувањето во воздушниот простор на нашата земја нема да биде оправдано и дека Турција ќе продолжи да ги презема сите мерки против тоа“, соопшти Дирекцијата за комуникации на Претседателството на Република Турција.
Ердоган ја нагласи потребата од преговори и напорите што Турција ги вложува за нивно обновување. Турскиот претседател, исто така, изрази тага поради загубата на човечки животи, вклучително и на деца кои загинаа како резултат на ракетен напад врз училиште во иранскиот град Минаб.
Турскиот шеф на државата, исто така, изрази сочувство за смртта на ајатолахот Али Хамнеи и изрази надеж дека изборот на Моџтаба Хамнеи за нов духовен водач на Иран ќе донесе мир во регионот.