ИРАН ПОВЕЌЕ НЕМА ДА ПРЕГОВАРА СО САД Ние се браниме, а војната во регионот е последица на американските напади
Веќе ги предупредивме сите во регионот дека ако САД нè нападнат, ќе мора да ги нападнеме нивните бази во регионот, а како резултат на тоа, војната ќе се прошири низ целиот регион, вели иранскиот министер за надворешни работи, Абас Арагчи.
Не верувам дека прашањето за повторни преговори со Американците ќе биде ставено на дневен ред, рече иранскиот министер за надворешни работи, Абас Арагчи, во интервју за телевизијата ПБС.
Според Арагчи, САД го пропуштиле потенцијалот за идни преговори со постојано напаѓање на Иран за време на дипломатските разговори – прво во јуни минатата година и сега.
– Оваа година се обидоа да нè убедат дека овој пат е поинаку. Ни ветија дека немаат намера да нè нападнат. Затоа не мислам дека разговорите со Американците повторно ќе бидат на дневен ред – рече Арагчи.
Министерот, исто така, негираше дека Иран намерно врши притисок врз САД и врз Израел со напаѓање на производството на нафта во земјите во регионот. Тој рече дека танкерите за нафта „се плашат да поминат низ Ормускиот Теснец“, но „Иран не ги спречува да пловат во овој теснец“.
Арагчи ја обвини американската и израелската агресија против Иран, велејќи дека нивните напади го дестабилизирале регионот.
Ова е војна што ни беше наметната, а ние само се браниме, додаде тој.
– Постои агресија против нас што е апсолутно нелегална. А она што го правиме е чин на самоодбрана, што е легален и легитимен. Веќе ги предупредивме сите во регионот дека ако САД нè нападнат, бидејќи не можеме да стигнеме до американска територија, ќе мора да ги нападнеме нивните бази во регионот, нивните објекти, нивните локации, нивните средства. Како резултат на тоа, војната ќе се прошири низ целиот регион. Значи, ова се последиците, последиците од американската агресија против нас. Ние не сме одговорни за ова – рече највисокиот дипломат на Иран.