ИРАК ГО ПРЕЗЕМА ОД „ЛУКОИЛ“ НАФТЕНОТО ПОЛЕ „ЗАПАДНА КУРНА 2“ Производството на ова поле е клучно за извозот на земјата

Ирачката влада денеска објави дека ќе го преземе управувањето со нафтеното поле Западна Курна 2 од „Лукоил“, во согласност со условите на договорот за услуги со рускиот нафтен гигант.

– Државната нафтена компанија Басра ќе ги покрива платите за локалните вработени, оперативните трошоци и плаќањата на подизведувачите, користејќи сметка поврзана со нафтеното поле Маџнун за да го олесни процесот – рече ирачки менаџер на нафтеното поле Западна Курна 2.

Производството во Западна Курна 2 е сè уште стабилно и изнесува околу 465.000 до 480.000 барели нафта дневно.

„Лукоил“ поседува 75% од акциите во Западна Курна 2, а остатокот е контролиран од ирачката државна нафтена компанија Саут Оил Компани.

По воведувањето на американските санкции во октомври, „Лукоил“ одлучи да продаде странски средства, вклучително и удел во ирачко нафтено поле.

Ирачките експерти во ноември изјавија дека Западна Курна 2 е преголем проект за управување на ирачките државни компании.

На почетокот на декември, министерството објави дека поканило неколку големи американски нафтени компании да испратат понуди за преземање на уделот на „Лукоил“, наведувајќи дека победникот на тендерот ќе го замени рускиот гигант како менаџер.

Според извори, десетина инвеститори, вклучувајќи ги американските нафтени гиганти „Ексон Мобил“ и „Шеврон“, како и американската инвестициска компанија „Карлајл“, изразиле интерес за купување удел во „Западна Курна 2“.

Министерството за нафта на Ирак сега одлучи да ги преземе операциите за да спречи евентуални прекини во производството.

„Западна Курна 2“ е едно од најголемите нафтени полиња во светот, а неговото производство е клучно за ирачкиот извоз.

Ирак е втор на ранг-листата на водечки производители во Организацијата на земјите извознички на нафта (ОПЕК), веднаш зад Саудиска Арабија, а продажбата на сурова нафта сочинува 90 проценти од буџетските приходи на Ирак.

Во моментов, Ирак извезува 3,4 милиони барели нафта дневно. Нафтата од Западна Курна 2 сочинува 0,5% од светското производство и околу 9% од ирачкото.

Нема информации дали „Лукоил“ се согласил со ирачката намера.