ИНТЕРЕС НА РАБОТНИЦИТЕ Е ДА ИМААТ РАБОТА, А НИЕ СЕ БОРИМЕ ДА ИМ ЈА ОБЕЗБЕДИМЕ Мицкоски ги потсети синдикатите дека минималецот се зголемува по закон
Премиерот им забележа на лидерите на некои синдикати дека стануваат политичари или се залагаат за одредени партии и не го гледаат интересот на работниците, но како што рече ќе дебатира со секој од нив.
Покачувањето на минималната плата е регулирано со закон. Јас жалам за обидите на дел од раководството на синдикалните организации да бидат политичари или, пак, слуги на опозициски политичари или опозициски партии, а не да работат во интересот на работниците, одговори денеска премиерот Христијан Мицкоски на новинарско прашање во врска со зголемувањето на платите, а со тоа и на минималната плата.
– Мислам дека интересот на работниците е да има работа, а не да нема работа. Јас мислам дека тоа е интересот. Јас се борам работниците да имаат работа, да заработат затоа што колку повеќе ќе имаме богати и среќни работници толку подобро ќе биде и за нас. Нашата политика не е богати и среќни неколкумина политичари коишто се богатат на грбот на работниците. Нашата политика е да имаме среќни работници, а изморени, измачени политичари коишто работат за интересот на работниците – рече Мицкоски при посетата на Кавадарци.
Тој додаде дека со тие синдикални лидери е секогаш подготвен да седне и да разговара.
-А октроирани со фалсификувани документи лидери на синдикални организации коишто се политички инструмент на опозициски партии, коишто се сликаа најчесто пред 1 Мај а ништо не испорачуваа за работниците жалам, можам да изразам жалење што тие дозволиле да бидат вклучени во еден таков процес и ги замолувам во името на позицијата која што ја држат таква каква што ја држат на начин како што ја држат да внимаваат затоа што ние сме нивен партнер, на работниците. Сакаме да имаме среќни и богати работници – рече Мицкоски.